Goa Crime: गाडी मागे घेण्यावरून वाद पेटला, दगडफेक करून पर्यटकांना मारहाण; काचेच्या बाटलीने स्वतःलाही केले जखमी

म्हापसा: गोव्याच्या करासवाडा भागातील गोठणीचा व्हाळ येथे शनिवारी (दि. १३) दुपारी दीड वाजण्याच्या सुमारास एका क्षुल्लक वादातून हाणामारीचा गंभीर प्रकार घडला. यात कोल्हापूरहून आलेल्या तीन पर्यटकांना मारहाण करण्यात आली, ज्यात तिघे गंभीर जखमी झाले आहेत. पोलिसांनी तात्काळ घटनास्थळी धाव घेऊन परिस्थिती नियंत्रणात आणली.

नेमकी घटना काय घडली?

कोल्हापूर येथील गणेश वाठारे आणि आलफे नदाफ हे आपल्या दोन सहकाऱ्यांसह गोव्यात फिरण्यासाठी आले होते. त्यांची गाडी गॅरेजमधून बाहेर काढताना एका स्थानिकासोबत त्यांचा वाद झाला. हा शाब्दिक वाद इतका विकोपाला गेला की, स्थानिकाने थेट पर्यटकांवर हल्ला चढवला. संशयित आरोपी रशीद सिद्धकी महम्मद याने रागाच्या भरात गाडीवर मोठा दगड फेकून वाहनाचे नुकसान केले. त्यानंतर त्याने गोंधळ घालत काचेची बाटली फोडून स्वतःलाही जखमी केले, ज्यामुळे परिसरात भीतीचे वातावरण निर्माण झाले.

पोलिसांनी तात्काळ धाव घेत परिस्थिती नियंत्रणात आणली

घटनेची माहिती मिळताच कोलवाळ पोलिसांनी क्षणाचाही विलंब न करता घटनास्थळी धाव घेतली. पोलिसांनी तातडीने जखमी झालेल्या पर्यटकांना आणि संशयित रशीदला म्हापसा येथील जिल्हा रुग्णालयात दाखल केले.

गणेश वाठारे आणि आलफे नदाफ यांना डोक्याला आणि शरीराला गंभीर दुखापत झाल्यामुळे त्यांना पुढील उपचारासाठी गोमेकॉ (GMC) रुग्णालयात हलवण्यात आले आहे. पोलिसांनी याप्रकरणी संशयित रशीदला ताब्यात घेतले असून पुढील तपास कोलवाळ पोलीस ठाण्याचे निरीक्षक करत आहेत. या घटनेतील पर्यटकांची कार आणि संशयिताची दुचाकी दोन्ही वाहने पोलिसांनी पुढील तपासणीसाठी जप्त केली आहेत.