Goa Crime: बारमध्ये वाद, पोलिसांशी अरेरावी,डिचोलीत मध्यरात्री हाय व्होल्टेज ड्रामा; तिघांना अटक

डिचोली: दारूच्या नशेत गोंधळ घालून पोलिसांशी अरेरावी करणाऱ्या तीन स्थानिक तरुणांना डिचोली पोलिसांनी ताब्यात घेतले आहे. व्हाळशी-डिचोली येथील एका बारमध्ये झालेल्या वादामुळे ही घटना घडली असून, पोलिसांनी तातडीने कारवाई करत शांतता भंग करणाऱ्या या तिघांवर गुन्हा दाखल केला आहे.

व्हाळशी येथील बारमधील वादातून गोंधळ

पोलिसांनी दिलेल्या माहितीनुसार, व्हाळशी येथील एका बारमध्ये तिघांचा वाद झाला होता. त्यानंतर हे तिघेही दारूच्या नशेत आणि संतप्त अवस्थेत थेट डिचोली पोलीस ठाण्यात पोहोचले. तेथे त्यांनी पोलिसांसमोरच गोंधळ घालण्यास सुरुवात केली आणि आक्रमक वर्तन केले.

शांतता भंग केल्याप्रकरणी गुन्हा दाखल

परिस्थितीचे गांभीर्य लक्षात घेत, पोलिसांनी पुढील कोणताही गंभीर गुन्हा घडू नये यासाठी त्यांना ताब्यात घेतले. डिचोली पोलिसांनी या तिघांनाही शांतता भंग केल्याबद्दल आणि सार्वजनिक ठिकाणी गैरवर्तन केल्याबद्दल गुन्हा दाखल करून प्रतिबंधात्मक अटक केली आहे. याप्रकरणी पुढील तपास सुरू आहे.

पोलिसांकडून ३१ ठिकाणी तपासणी

उत्तर गोवा पोलिसांनी सुरक्षा मजबूत करण्यासाठी आणि गुन्हे रोखण्यासाठी या सप्ताहात मोठ्या प्रमाणावर नाका तपासणी मोहीम राबवली. उत्तर गोवा पोलिस अधीक्षकांच्या मार्गदर्शनाखाली ही कारवाई उत्तर गोव्यात एकूण ३१ ठिकाणी करण्यात आली.

प्रत्येक ठिकाणी पोलिस उपनिरीक्षक पातळीवरील अधिकारी तैनात केले होते. नागरिक आणि पर्यटकांना सुरक्षिततेची हमी देण्यासाठी तसेच कायदा-सुव्यवस्था अधिक सक्षम करण्याच्या सततच्या प्रयत्नांचा हा भाग असल्याची माहिती उत्तर गोवा पोलिसांनी दिली. उत्तर गोवा पोलिस अधीक्षकांनी माध्यमांना वरील माहिती दिली