ऐतिहासिक! गोव्यात पहिल्यांदाच लोकसभेसाठी सर्वाधिक मतदान, 17.82 कोटींचा मुद्देमाल जप्त

Goa Loksabha Voting

देशात तिसऱ्या टप्प्यातील लोकसभा मतदान मंगळवारी (दि.०७ मे) पार पडले. यात गोव्यासह देशातील ९४ लोकसभा जागांसाठी मतदान करण्यात आले. गोव्यात दोन लोकसभा जागांसाठी पहिल्यांदाच सर्वाधिक मतदानाची नोंद झाली आहे.

राज्यात 76.04 टक्के मतदानाची नोंद झाल्याची माहिती गोवा निवडणूक अधिकारी रमेश वर्मा यांनी दिली आहे.

रमेश वर्मा यांनी दिलेल्या माहितीनुसार, राज्यात 76.04 टक्के मतदानाची नोंद झाली असून, यात उत्तर गोव्यात 77.79 टक्के तर दक्षिण गोव्यात 74.47 टक्के मतदानाची नोंद झाली आहे.

निवडणूक विभागाकडे एकूण 190 तक्रारी प्राप्त झाल्या असून, त्यापैकी 38 आचारसंहिता उल्लंघन केल्याप्रकरणी दाखल केल्याची माहिती वर्मा यांनी दिली.

गोव्यात 16 मार्चपासून 17.82 कोटी रुपयांचा मुद्देमाल जप्त करण्यात आला. यात रोख रक्कम, भेटवस्तू आणि बेकायदेशीर वस्तूंचा समावेश आहे. गोवा विधानसभेच्या 2022 साली झालेल्या निवडणूक काळात जप्त करण्यात आलेल्या मुद्देमालाच्या तुलनेत यात 40 टक्के वाढ झाली असून, 2019 च्या लोकसभा निवडणुकीत जप्त करण्यात आलेल्या वस्तूंपेक्षा 55 टक्के अधिक असल्याची माहिती वर्मा यांनी दिली.