![Amit Patkar Criticized BJP Government](http://media.assettype.com/dainikgomantak%2F2024-02%2F445cdfde-b362-48e0-be5b-d177d326011f%2FDainik_Gomantak___2024_02_09T150157_106.jpg?rect=0%2C0%2C1200%2C675&w=480&auto=format%2Ccompress&fit=max)
Goa Congress state president Amit Patkar Criticized BJP Government:
सद्यस्थिती पाहता भाजप सरकारचा कारभार दिशाहीन झाल्यासारखा वाटतो. पक्षनिष्ठ कार्यकर्त्यांची कदर करण्याऐवजी बाहेरच्यांना आणून उमेदवारी दिली जात आहे. भाजप सरकारची हिटलरला लाजवेल, अशी मुजोरशाही सुरू असून विरोधकांना संपवण्याचे षडयंत्र रचले जात आहे, असा आरोप कॉंग्रेस प्रदेशाध्यक्ष अमित पाटकर यांनी फोंडा येथील कार्यकर्त्यांच्या बैठकीत केला.
यावेळी दक्षिण गोव्याचे उमेदवार कॅप्टन विरियातो फर्नांडिस, विरोधी पक्षनेते युरी आलेमाव, केपेचे आमदार एल्टन डिकॉस्ता, कॉंग्रेसचे सरचिटणीस सावियो फर्नांडिस, फोंड्यातील नेते राजेश वेरेकर, गोवा फॉरवर्डचे नेते दुर्गादास कामत, गटाध्यक्ष विलियम आगियार आणि मान्यवर उपस्थित होते.
सध्या राज्यात दंडेलशाही सुरू असल्यामुळे लोक उघडपणे बोलायला घाबरतात; पण त्यांच्या मनाचा कानोसा घेतल्यास ते विद्यमान सरकारला धडा शिकवण्यास बघत आहेत, असे डिकॉस्ता म्हणाले. फोंडा मतदारसंघातून कॉंग्रेसच्या उमेदवाराला भरपूर मताधिक्य मिळेल, अशी आशा त्यांनी व्यक्त केली.
यावेळी साहित्यिक एन. शिवदास यांनी तृणमूल कॉंग्रेसला सोडचिठ्ठी देऊन कॉंग्रेसमध्ये प्रवेश केला. सावियो फर्नांडिस यांनीही मनोगत व्यक्त केले. सुरुवातीला सर्व नेत्यांनी विठोबा देवालयाला भेट दिली. सूत्रसंचालन अरुण गुडेकर यांनी केले, तर शेख शब्बीर यांनी आभार मानले.
फोंड्याचे कॉंग्रेस नेते राजेश वेरेकर म्हणाले, फोंड्यात अनेक समस्या असून उपजिल्हासारख्या सरकारी इस्पितळात सुविधा नसल्यामुळे गंभीर रुग्णांना गोवा मेडिकल कॉलेजमध्ये जावे लागत असून त्यात प्राणहानीही होत आहे. फोंडा तालुक्यात चार मंत्री असूनसुध्दा हा तालुका ‘अनाथ’ झाल्यासारखे वाटते, असे ते म्हणाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.