Goa: "सुरक्षारक्षकांच्या वेतनावरील 18% जीएसटी बंद करणार" CM प्रमोद सावंतांचे विधानसभेत आश्‍‍वासन

पणजी : गोवा मनुष्यबळ विकास महामंडळातर्फे नेमण्यात आलेल्या सुरक्षारक्षकांच्या वेतनातून १८ टक्के वस्तू व सेवा कर (जीएसटी) कपात करणे लवकरच बंद केले जाईल, असे आश्‍‍वासन मुख्यमंत्री डॉ. प्रमोद सावंत यांनी विधानसभेत दिले.

राज्याचे वित्त खाते, वस्तू व सेवा कर खाते आणि महामंडळ यावर तोडगा काढण्याचे प्रयत्न करत असल्याचे त्यांनी नमूद केले.

विरोधी पक्षनेते युरी आलेमाव यांनी शून्य तासाला हा विषय उपस्थित केला होता. ते म्हणाले की, सुरक्षारक्षक म्हणून काम करणारे लोक आर्थिकदृष्ट्या कमकुवत घटकातील असतात.

मुळातच त्यांना वेतन कमी आहे आणि त्यातूनही १८ टक्के जीएसटी वजा केल्यास त्यांनी आपला प्रपंच कसा करावा?. त्‍यामुळे त्‍यांना जीएसटी जाळ्याच्या बाहेर ठेवण्याचा विचार सरकारने करावा.