Sulakshana Sawant: आप खासदार संजय सिंग अडचणीत; गोवा मुख्यमंत्र्यांच्या पत्नीकडून 100 कोटींचा अब्रू नुकसानीचा खटला दाखल

पणजी: गोव्यातील नोकरी घोटाळा प्रकरणात मुख्यमंत्र्यांच्या पत्नीवर आरोप करणारे आप नेते राज्यसभा खासदार संजय सिंग अडचणीत सापडले आहेत. मुख्यमंत्री डॉ. प्रमोद सावंत यांच्या पत्नी सुलक्षणा सावंत यांनी सिंग यांच्या विरोधात १०० कोटी रुपयांचा अब्रू नुकसानीचा खटला दाखल केला आहे. भाजपच्या वतीने घेण्यात आलेल्या पत्रकार परिषदेत ही माहिती देण्यात आली.

सरकारी नोकरीच्या नावाखाली गोमंतकीयांची कोट्यवधी रुपयांची फसवणूक करणारे 'कॅश फॉर जॉब' प्रकरणावर आप नेते संजय सिंग यांनी गोवा भाजप सरकारवर टीका केली होती. याप्रकरणात मुख्यमंत्र्यांच्या पत्नीसह, मंत्री व आमदारांचा समावेश असल्याचा आरोप, सिंग यांनी केला होता. गेली 10 वर्षे गोवा भाजप जनतेला नोकरीचे आमिष दाखवून फसवत असल्याची टीका सिंग यांनी दिल्लीतील पत्रकार परिषदेत केली होती.

गोव्यातून देखील विरोधी पक्षातील अनेक नेत्यांनी मुख्यमंत्र्यांच्या पत्नीवर आरोप केले होते. मुख्यमंत्री सावंत यांनी याप्रकरणात पत्नीचे नाव घेणाऱ्यांवर बदनामीचा खटला दाखल करण्याचा इशारा दिला होता. दरम्यान, आता याप्रकरणी आप खासदार संजय सिंग यांच्याविरोधात पहिला अब्रू नुकसानीचा खटला दाखल करण्यात आलाय. डिचोली कोर्टात हा खटला दाखल करण्यात आला आहे.

कॅश फॉर जॉब प्रकरणात पूजा नाईक, दीपश्री सावंत गावस यांच्यासह जवळपास ३० ते ३५ जणांना अटक करण्यात आलीय. या घोटाळ्याची रक्कम कोट्यवधी रुपयांच्या घरात जात आहे. विरोधकांनी या प्रकरणावरुन सत्ताधाऱ्यांना घेरत न्यायालयीन चौकशीची मागणी केली. सध्या ईडीने या प्रकरणाचा तपास हाती घेतला असून, पोलिसांकडून प्रकरणाची सर्व माहिती ईडीचे अधिकारी घेत आहेत.

नोकरी घोटाळा प्रकरणात मुख्यमंत्र्यांच्या पत्नीवर देखील आरोप करण्यात आले होते. याप्रकरणी पत्नीचे नाव विनाकारण घेतले जात असून, आरोप करणाऱ्यांविरोधात अब्रू नुकसानीचा खटला दाखल करण्याचा इशारा दिला होता. त्यानुसार खासदार संजय सिंग यांच्या विरोधात खटला दाखल करण्यात आला आहे. दिल्ली मद्य घोटाळा प्रकरणामुळे अडचणीत सापडलेले संजय सिंग आता सुलक्षणा सावंत यांनी दाखल केलेल्या खटल्यामुळे अडचणीत येण्याची शक्यता आहे.