वायनाड भूस्खलननंतर गोव्याचे मुख्यमंत्री अलर्ट मोडवर, यंत्रणांना दिले महत्त्वाचे आदेश

Goa CM Pramod Sawant On Wayanad Landslide

पणजी : वायनाड येथील भूस्खलनाच्या दुर्घटनेत १०० हून अधिक नागरिकांचा बळी गेल्यानंतर आता गोवा सरकारही अलर्ट मोडवर गेले आहे. गोव्याचे मुख्यमंत्री प्रमोद सावंत यांनी विधानसभेत याबाबत माहिती दिली. वायनाडमधील दुर्घटना आपले डोळे उघडणारा प्रसंग आहे, असं म्हणत सावंतांनी प्रशासनाला भूस्खलन क्षेत्राला धक्का लागता कामा नये, असे निर्देश दिले आहेत.

गोवा विधानसभेचे पावसाळी अधिवेशन सुरू असून गुरूवारी वायनाडमधील दुर्घटनेच्या पार्श्वभूमीवर चर्चा झाली. यावेळी उत्तर देताना प्रमोद सावंत म्हणाले, वायनाडमधील दुर्घटना ही आपल्या सर्वांचे डोळे उघडणारा उघडणारा प्रसंग आहे. मी आपत्ती व्यवस्थापन यंत्रणांना दरडप्रवण क्षेत्राकडे विशेष लक्ष देण्याचे निर्देश दिले आहेत. दरड कोसळण्याची शक्यता असलेल्या भागांना आपण धक्का लावू शकत नाही.

बाबूश मोन्सेरात काय म्हणाले?

राज्यात भूस्खलन, दरड कोसळण्याच्या घटना टाळण्यासाठी आपत्ती व्यवस्थापन विभागाने सर्व नियोजन आणि विकास विभागांसाठी दिशानिर्देश जारी केले आहेत. विकासकामांना परवानगी देताना संबंधित विभागांना उपाययोजनांकडे गांभीर्याने लक्ष द्यावे, असे महसूलमंत्री बाबूश मोन्सेरात यांनी सांगितले. तसेच अशा नैसर्गिकदृष्ट्या संवेदनशील भागांमधील उपाययोजनांमध्ये काय सुधारणा करता येतील यासाठी तज्ज्ञांची मदत घेणार आहोत, असेही ते म्हणाले.