पिसुर्ले: गेल्या काही दिवसांपासून सिंधुदुर्ग-महाराष्ट्राच्या सीमेवरून गोव्यात आलेल्या ‘ओंकार’ हत्तीने पेडणे तालुक्यातील मोपा, कडशी, तोरसे आणि आता तांबोसे परिसरात हैदोस घातला आहे. सलग तीन दिवसांपासून हा हत्ती तांबोसे गावातील मळ्यात शिरून शेतकऱ्यांच्या भातशेती आणि कवाथे-पोफळीची झाडे उध्वस्त करत आहे. या मोठ्या नुकसानीमुळे शेतकरी हवालदिल झाले असून, त्यांना आपल्या शेतात जाण्याचीही भीती वाटत आहे. अखेर, या समस्येवर मुख्यमंत्री डॉ. प्रमोद सावंत यांनी पहिल्यांदाच प्रतिक्रिया दिली आहे.
मुख्यमंत्र्यांनी सांगितले की, 'ओंकार' हत्तीला सुरक्षितपणे त्याच्या मूळ ठिकाणी हलवण्यासाठी महाराष्ट्र, कर्नाटक आणि गोवा या तीन राज्यांच्या सरकारमध्ये समन्वय साधण्याचे काम सुरू आहे.
वन विभाग या समस्येवर सक्रियपणे काम करत आहे आणि लवकरच या हत्तीला सुरक्षित स्थळी हलवण्यासाठी प्रयत्न केले जात आहेत. तसेच, ज्या शेतकऱ्यांच्या शेतीचे नुकसान झाले आहे, त्यांना योग्य भरपाई दिली जाईल, असे आश्वासनही मुख्यमंत्र्यांनी दिले.
दुसरीकडे, तांबोसे गावातील शेतात तिसऱ्या दिवशीही ओंकार हत्तीने ठिय्या मांडून मोठे नुकसान केले. हत्तीकडून पोफळी आणि केळीच्या झाडांची नासधूस सुरूच आहे. यावर वन खात्याचे अधिकारी शेतकऱ्यांना वारंवार आवाहन करत आहेत की त्यांनी जमाव करून शेतात जाऊ नये. ज्या शेतकऱ्यांचे नुकसान झाले आहे, त्यांना नुकसान भरपाई दिली जाईल, अशी ग्वाही वन खात्याकडून दिली जात आहे. मात्र, हत्तीला तातडीने हलवण्याची मागणी शेतकरी करत आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.