राज्यात कार्निव्हलची जय्यत तयारी सुरू

पणजी: येत्या 26 फेब्रुवारीपासून कार्निव्हलची धूम सुरू होत असल्याने राज्यात त्याची तयारी जोरदारपणे सुरू झाली आहे. कार्निव्हलचे आकर्षण असलेल्या ‘किंग मोमो’ निवड उद्या 22रोजी होणार असून त्यासाठी पर्यटन खात्याने बैठक आयोजित केली आहे. (goa Carnival Preparations continue vigorously in the state)

पर्यटन खात्याच्या मदतीने कार्निव्हल महोत्सव आयोजित केला जातो. या खात्याकडून ज्या पालिका क्षेत्रामध्ये कार्निव्हल मिरवणूक काढली जाते. त्यांना ठराविक अनुदान दिले जाते. यावर्षी हा कार्निव्हल पणजी, मडगाव (Margao), मुरगाव व म्हापसा या प्रमुख शहारांपुरताच मर्यादित ठेवला गेला आहे. कोविडच्या (Covid-19) पार्श्‍वभूमीवर तो आणखी इतर ठिकाणी होणार नाही. उद्या होणाऱ्या बैठकीसाठी पर्यटन खात्याने पणजी महापालिका, मडगाव पालिका, मुरगाव पालिका व म्हापसा पालिकेच्या मुख्याधिकाऱ्यांना बोलावण्यात आले आहे. किंग मोमो यासाठी 12 फेब्रुवारीला जाहिरात देण्यात आली होती.

अनेक अर्ज यासाठी आले आहेत. या बैठकीत आलेल्या अर्जांवर सविस्तर चर्चा होऊन ‘किंग मोमो’ साठी नाव निश्‍चित करून तो घोषित होण्याची शक्यता आहे. खा प्या व मजा करा असा संदेश किंग मोमोने दिल्यानंतर राज्यात कार्निव्हलला (Goa Carnival) सुरुवात होते. या महोत्सवाला मोठ्या संख्येने देशी व विदेशी पर्यटक गोव्यात येतात.