Goa Carnival: कार्निव्हलवेळी राजधानी गुदमरली!

Goa Carnival: राजधानी पणजीत दरवर्षी होणारा कार्निव्हल, ही गोव्याची आंतरराष्ट्रीय ओळख नक्कीच असेल. परंतु यंदा ‘स्मार्ट सिटी’च्या कामांसाठी खोदलेले रस्ते आणि वळवलेली वाहतूक यांमुळे गोंगाट, प्रचंड गर्दी, खोदलेल्या रस्त्यांवर विखुरलेला चिखल, वाहनांचा धूर अशा प्रदूषित वातावरणात शनिवारी संध्याकाळी पणजीचा जीव अक्षरश: गुदमरून गेला होता.

‘खा प्या आणि मजा करा’ असा संदेश देणाऱ्या किंग मोमोची राजवट गोव्यात शनिवारपासून सुरू झाली. कार्निव्हलची भव्य मिरवणूक दिवजा सर्कलपासून कला अकादमीपर्यंत आयोजित केली होती. यासाठी राज्यभरातून नागरिकांनी गर्दी केली होती. त्यात देशी-विदेशी पर्यटकांची संख्याही लक्षणीय होती.

कार्निव्हलच्या निमित्ताने पणजीतील दयानंद बांदोडकर मार्गावरील नेहमीची वाहतूक महात्मा गांधी आणि दादा वैद्य मार्गाने वळविली. तशा सूचना वाहतूक पोलिसांनी अगोदरच दिल्या होत्या.

अशातच ‘स्मार्ट सिटी’च्या कामांसाठी पणजीतील मुख्य रस्त्यांची खोदून अक्षरशः चाळण केली आहे. खोदकामामुळे पणजी चिखलमय झाली असताना आज या रस्त्यांवरूनच वाहतूक वळवल्याने प्रचंड कोंडी झाली.

दुपारपासून पोलिस रस्त्यावर

कार्निव्हलनिमित्त बंदोबस्त व वाहतूक सुरळीत ठेवण्यासाठी दुपारपासूनच शेकडो पोलिस मिरवणूक मार्गासह अंतर्गत मार्गांवर तैनात केले होते.

दुपारपासूनच पोलिसांनी पणजीतील वाहतूक सुरळीत करण्यासाठी आटोकाट प्रयत्न केले. मात्र, खोदलेल्या रस्त्यांमुळे वाहनचालकांना वाट काढणे अवघड बनले होते. दुचाकीस्वारांचा बेशिस्तपणाही वाहतूक कोंडीस कारणीभूत ठरल्याचे पोलिसांनी सांगितले.