CM Pramod Sawant: गोवा 'या' क्षेत्रात ग्लोबल हब होऊ शकतो, मुख्यमंत्री सावंत यांनी व्यक्त केला विश्वास

CM Pramod Sawant: गोव्यात जागतिक दर्जाच्या संस्था उभ्या राहून, राज्य भविष्यात जगभरातील विद्यार्थ्यांसाठी शैक्षणिक केंद्र बनू शकते असे मुख्यमंत्री प्रमोद सावंत म्हणाले.

गोव्यात QS इंडिया समिट 2023 हा तीन दिवसीय कार्यक्रम आयोजित केला होता. याच कार्यक्रमाला संबोधित करताना मुख्यमंत्री सावंत बोलत होते.

मुख्यमंत्री प्रमोद सावंत म्हणाले, "गोव्यात जागतिक दर्जाच्या संस्था उभ्या रहाव्यात अशी माझी इच्छा आहे. गोवा भविष्यात जगभरातील विद्यार्थ्यांसाठी शैक्षणिक केंद्र बनू शकते आणि जगभरातील विद्यार्थी येथे शिक्षण घेऊ शकतात.

गोव्याने यापूर्वीच यासंदर्भातील खासगी विद्यापीठ विधेयक मंजूर केले आहे. शैक्षणिक जागा खुल्या झाल्यामुळे, भारत आशियातील शैक्षणिक केंद्र म्हणून स्थान मिळवू शकेल आणि गोवा एक महत्त्वाचे शैक्षणिक ठिकाण म्हणून प्रस्थापित होण्यासाठी सज्ज असेल."

"शिक्षण हे मानवी विकासाचा मूलभूत पाया आहे आणि गुण नागरिकत्व विकसित करण्याचा महत्वाचा स्त्रोत आहे. गोवा सरकारचा या गोष्टीवर पूर्णपणे विश्वास आहे. गोमन्तकीय लोक जगभरात विस्तारले आहेत. त्यांनी देखील जगभरात गोव्याची शैक्षणिक प्रतिमा उंचावण्यासाठी मदत केली पाहिजे." असेही मुख्यमंत्री म्हणाले.

"गुणवत्तापूर्ण शिक्षण देऊन रोजगार आणि कौशल्यपूर्ण कर्मचारी निर्मितीवर लक्ष केंद्रित केले जाईल. संयुक्त राष्ट्रांच्या शाश्वत विकास लक्ष्यात देखील याचाच उल्लेख आहे. पंतप्रधान नरेंद्र मोदी यांनी प्राथमिक शिक्षणावर लक्ष केंद्रित करून शिक्षण प्रणालीमध्ये परिवर्तन करण्यावर भर दिला आहे."

यावेळी मुख्यमंत्री सावंत यांनी राष्ट्रीय शैक्षणिक धोरण 2020 कडे लक्ष वेधत, पंतप्रधान नरेंद्र मोदी यांच्या दूरदृष्टीने आणलेल्या नवीन शैक्षणिक धोरण शिक्षण क्षेत्रात सुधारणा करण्यास मदत करेल असे स्पष्ट केले.

देशाला पुढे नेण्यासाठी आवश्यक मनुष्यबळ निर्माण करणारी मजबूत शिक्षण व्यवस्था आपल्याकडे असली पाहिजे, असेही सावंत यांनी म्हटले आहे.

"आम्हाला या गोष्टीचा अभिमान आहे गोवा भारतातील सर्वात साक्षर राज्य आहे आणि राज्याने शैक्षणिक क्षेत्रात उल्लेखनीय प्रगती केली आहे. गोवा हे सर्वाधिक जीडीपी असलेले भारतातील सर्वात लहान राज्य आहे." असेही ते म्हणाले.