Police Have Seized High Quality Mobile Phones Using Modern Technology गोव्यात येणाऱ्या पर्यटकांच्या साहित्यांची, मोबाईल, लॅपटॉप सारख्या गॅझेटची चोरी होण्याच्या घटना वारंवार घडत असून मानवी सहकार्याने पोलिसांना काही प्रकरणांचा छडा लावण्यात यश आलंय.
मात्र आता पोलिसांनी आधुनिक तंत्रज्ञानाचा वापर करून चोरीच्या घटनांचा शोध घेण्यास सुरुवात केली असून त्यात त्यांना पुरेपूर यश देखील आलंय.
नुकतंच कळंगुट पोलिसांनी आधुनिक तंत्रज्ञान CEIR पोर्टलचा वापर करून गेल्या 3 महिन्यांत उच्च दर्जाचे 51 मोबाईल फोन ट्रॅक केल्याची बातमी हाती येतेय.
कळंगुट, बागा सारख्या किनारी भागात पर्यटकांच्या वस्तूंची चोरी होण्याच्या घटनांमध्ये कमालीची वाढ झाली होती.
कळंगुट पोलीस स्टेशनच्या हद्दीतसुद्धा पर्यटकांचे मोबाईल फोन चोरीला गेल्याच्या घटना नोंदवण्यात आल्या होत्या. कळंगुट पोलिसांनी CEIR पोर्टलचा वापर करून विविध ब्रँडचे असे 51 मोबाईल फोन शोधून काढले आहेत.
यात प्रामुख्याने वन प्लस आणि सॅमसंग या कंपनीच्या मोबाईल फोनची संख्या जास्त होती. जप्त करण्यात आलेल्या फोन्सची एकूण रक्कम अंदाजे 13 लाख आहे.
जप्त केलेले फोन कायदेशीर प्रक्रिया पूर्ण करून मालकाला सुपूर्द करण्यात आले असल्याची माहिती प्राप्त झाली आहे. दरम्यान कळंगुट पोलीस स्टेशनचे पीआय परेश नाईक यांनी कळंगुट येथे येणाऱ्या पर्यटकांनी आपल्या वस्तू व मौल्यवान वस्तूंची काळजी घेण्याचे आवाहन देखील केलंय.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.