भीक मागण्यासाठी अल्पवयीन मुलांचा वापर, पोलिसांच्या कळंगुट- बागा परिसरात धाडी

Goa Crime: गोव्यात गुन्हेगारी घटनांमध्ये दिवसेंदिवस वाढ होत चालली असून अशा घटनांमध्ये परप्रांतीयांचा हात असल्याचे वारंवार सिद्ध होतंय. कळंगुट आणि बागा किनाऱ्यावर लहान मुलांना भीक मागण्यासाठी प्रवृत्त करणाऱ्या टोळीवर पोलिसांनी धाड टाकली. चाइल्ड लाईन संस्थेने केलेल्या तक्रारीवरून पोलिसांनी हि मोहीम यशस्वीरीत्या राबवली.

या संबंधी मिळालेल्या प्राथमिक माहिती नुसार भीमा काळे आणि त्यांच्या पत्नी मीरा काळे, सकुबाई काळे, चंपा शिंदे, सुरेश अशोक काळे, अनिता आब्बा काळे, पूजा अविनाश काळे, धनाजी पवार आशाबाई पवार (सर्व राहणार, मूळ उस्मानाबाद- महाराष्ट्र) यांनी अल्पवयीन मुलांचा वापर करून किनाऱ्यांवर भीक मागण्याचे प्रकार सुरु केले होते.

हा धक्कादायक प्रकार समोर आल्यावर चाइल्ड लाइनच्या सदस्या मायरा फर्नांडिस यांनी कळंगुट पोलिसात तक्रार दाखल केली होती.

दरम्यान या घृणास्पद प्रकाराविरोधात पोलिसांनी कळंगुट आणि बागा किनारी परिसरात फिरणाऱ्या वरील सर्व आरोपींवर बाल न्याय (मुलांची काळजी आणि संरक्षण) कायदा 2015 च्या कलम 11, कलम 76 अन्वये शिक्षापात्र गुन्हा दाखल करून ताब्यात घेतले.