Goa Cabinet Reshuffle: मंत्रिमंडळात दोघांना घेण्याच्या हालचाली सुरू; मात्र दोघांची खुर्ची धोक्यात

Goa Cabinet Reshuffle: गेल्या अनेक महिन्यांपासून चर्चेत असलेला मंत्रिमंडळातील बदलाचा विषय पुन्हा एकदा ऐरणीवर आला आहे. यासाठी मुख्यमंत्री डॉ. प्रमोद सावंत दिल्लीत गेले. ते पक्षाध्यक्ष जे. पी. नड्डा, गृहमंत्री अमित शहा आणि सरचिटणीस (संघटन) बी. एल. संतोष यांच्याशी चर्चा केल्याची माहिती आहे.

मागील वर्षी सप्टेंबर महिन्यात काँग्रेसमधून 8 आमदार भाजपात आले. त्यापैकी 5 जणांना विविध प्रकारची पदे देण्यात आली. तर तीन वरिष्ठ आमदारांना अद्याप कोणतीही पदे देण्यात आलेली नाहीत. त्‍यात दिगंबर कामत, मायकल लोबो आणि आलेक्स सिक्वेरा यांचा समावेश आहे.

यापैकी काहींना मंत्रिमंडळात सामावून घेतले जाईल, असा शब्द केंद्रीय नेत्यांनी दिला होता, अशी माहिती आहे. यापैकी एकाला अथवा दोघांना मंत्रिमंडळात घेण्याच्या हालचालींना वेग आला आहे. मात्र यासाठी विद्यमान मंत्रिमंडळातील दोन आमदारांना वगळावे लागणार आहे. यासाठीच मुख्यमंत्री केंद्रीय नेत्यांशी चर्चा करत आहेत.

मंत्रिमंडळात बदल करायचा झाल्यास किंवा अन्य मंत्र्यांना मंत्रिमंडळात घ्यावयाचे झाल्यास विद्यमान मंत्रिमंडळात जितक्या मंत्र्यांना घ्यावयाचे आहे, तितक्याच मंत्र्यांना वगळावे लागणार आहे. त्यामुळे राजकीय वर्तुळात चर्चांना उधाण आले आहे. मुख्यमंत्री आणि पक्षश्रेष्ठी नेमका काय निर्णय घेणार याकडे सगळ्यांचे लक्ष लागून राहिले आहे.