पणजी, राज्यात आजपासून (ता. ४) नवीन शैक्षणिक वर्षाला सुरूवात आहे. शाळेच्या पहिल्या दिवशी नव्या गणवेशात, नवे दप्तर, नवी छत्री, रेनकोट घेऊन शाळेत जाण्यासाठी सोमवारी पणजी येथील बाजारपेठेत पालकांसहित विद्यार्थ्यांनी मोठ्या प्रमाणात गर्दी केली होती.
पालकांनी आपल्या मुलांची हौस भागविण्यासाठी विविधांगी शालेय तसेच पावसाळी साहित्याची खरेदी केली. यंदा शालेय साहित्याच्या दरात मागील वर्षाच्या तुलनेत १० ते १५ टक्क्यांनी वाढ झाली आहे. वह्या, पुस्तके, स्टेकपेन तसेच इतर वस्तूंच्या दरात वाढ झालेली आहे.
रंगबिरंगी छत्र्या आणि कार्टूनचित्राच्या रेनकोटला पसंती
राज्यात अजून मॉन्सूनला सुरुवात झालेली नाही, तरी देखील तुरळक पाऊस पडू लागला आहे. त्यामुळे मुलांना शाळेत ये-जा करण्यासाठी लागणारी छत्री, रेनकोट, पावसाळी चपला, आदींची मोठ्या प्रमाणात खरेदी होत असून मुलांना रंगबिरंगी छत्र्या, तसेच कार्टून चित्र असलेले रेनकोट मुलांना अधिक आकर्षित करत असल्याने मुले पालकांना हे अशा प्रकारच्या रंगबिरंगी छत्र्या तसेच कार्टूनची चित्रे असलेले रेनकोट खरेदीची गळ घालत आहेत. बाजारात २०० रुपये व त्याहून अधिक किमतीच्या छत्र्या बाजारात उपलब्ध आहेत.
जर्नलचे दर वाढले
यंदा शालेय साहित्यात प्रामुख्याने २०० पानी वही, भूगोल आणि विज्ञान विषयासाठी लागणारे जर्नलच्या किंमतीत मोठ्या प्रमाणात वाढ झाली आहे. गेल्यावर्षी २५ रुपयांना मिळणार जर्नल यंदा ७५ रूपयांना विकला जात आहे. काही वस्तू जसे की पेन, पेन्सिल आदींच्या दरात तसे मोठे बदल झालेले नाहीत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.