तरुण मुलींना काळाने हिरावले, पदरी दिव्यांग मुलगा; निराधार विधवा महिलेची घरासाठी परवड

Bicholim News: पावसाच्या तडाख्याने पडझड झालेल्या नानोडा येथील एका गरीब महिलेच्या घराला धोका निर्माण झाला आहे. या घराच्या दर्शनी भागाची मोठ्या प्रमाणात पडझड झाली असून, आतील भिंतीलाही तडे गेले आहेत.

यापुढे आणखी पर्जन्यवृष्टी झाल्यास हे घर कोसळण्याचा धोका असून, भीतीच्या छायेतच ही सत्यवती पर्येकर ही गरीब महिला दिवस कंठत आहे.

दोन दिवसांपूर्वी पडलेल्या पावसामुळे पर्येकर यांच्या घराची पडझड झाली. हलाखीच्या परिस्थितीत जीवन जगणारी ही महिला आता सरकारी मदतीच्या प्रतीक्षेत आहे. घर दुरुस्त करण्यासाठी कोणी पुढाकार घेईल का, असे आर्जव ती करत आहे.

खडतर जीवन प्रवास

सत्यवती पर्येकर या विधवा असून त्यांची जीवनगाथा सुन्न करणारी आहे. त्यांच्या पदरी एक मुलगा आहे. मात्र, लहानपणापासूनच तो मंदबुद्धीचा. त्यांच्या दोन तरुण मुलींनाही काळाने हिरावून नेले.

विधवांसाठी असलेल्या सरकारी योजनेतून मिळणारे दोन हजार रुपये आणि मिळेल ते काम करून सत्यवती आपल्यासह मुलाचा सांभाळ करत आहेत. अशा अवस्थेत घराची दुरुस्ती कशी करावी, या विवंचनेत त्या पडल्या आहेत.