Dance Bar: गोव्यातील बेकायदेशीर डान्‍सबारवर कारवाई सुरुच

Dance Bar: उच्च न्यायालयाच्या आदेशानुसार समुद्रकिनारी भागात ध्वनिप्रदूषणाविरोधात सध्‍या पोलिसांकडून कारवाई सुरू आहे. याच पार्श्वभूमीवर कळंगुट पंचायतीने बेकायदा डान्सबारविरोधात सोमवारपासून कडक पावले उचलली आहेत. काल रात्री दोन बेकायदा डान्सबारना टाळे ठोकण्‍यात आल्याची माहिती सरपंच जोसेफ सिक्वेरा यांनी दिली.

कळंगुट किनाऱ्याला दरवर्षी लाखो पर्यटक भेट देत असतात. परंतु अलीकडे पर्यटनाच्या नावाखाली किनारी भागात उतरलेल्या परप्रांतीय व्यवसायिकांनी अवैध धंदे, मसाज पार्लर, डान्सबार आदी प्रकार सुरू केल्याने पर्यटनाचा बट्ट्याबोळ होण्याबरोबरच कायदा व सुव्यवस्थेचा प्रश्न निर्माण झाला.

शेवटी स्थानिकांचा आग्रह तसेच मागणीनुसार कळंगुट पंचायतीने अशा बेकायदा व्यवसायांना लगाम घालण्यासाठी सोमवारपासून धडक कारवाई सुरू केली आहे. या कारवाईत पोलिसांना ग्रामस्थांचे चांगल्यापैकी सहकार्य मिळत असल्याचे सरपंच सिक्वेरा यांनी सांगितले. दरम्यान, मंगळवारी रात्रीही किनारी भागातील अवैध व्यवसाय तसेच डान्सबारवर कारवाई सत्र सुरूच होते.