Goa Assembly Session: पणजीतील सर्व सरकारी इमारतींवर बसवणार सोलर पॅनेल

Goa Assembly Session 2023: गोव्याची राजधानी पणजीतील सर्व सरकारी इमारतींवर सोलर पॅनेल बसवणार असल्याची माहिती, वीज मंत्री सुदिन ढवळीकर यांनी आज, सोमवारी विधानसभा अधिवेशनात बोलताना दिली.

मंत्री ढवळीकर म्हणाले की, सर्व सरकारी इमारतींवर सोलर पॅनेल बसवून त्यातून सौरउर्जेद्वारे वीजनिर्मिती केली जाईल. १५० मेगावॉट वीज निर्मिती याद्वारे केली जाईल. या आर्थिक वर्षापासून या कामाला सुरवात केली जाणार आहे आणि मार्च २०२४ पर्यंत हे काम पुर्ण केले जाणार आहे.

काही दिवसांपुर्वीच मुख्यमंत्री डॉ. प्रमोद सावंत यांनीही याबाबत माहिती दिली होती. ते म्हणाले होते की, राजधानी पणजी शहराची ओळख ‘सोलर सिटी’ म्हणून करण्यासाठी येत्या 2 वर्षांत शासकीय व खासगी उपक्रमांतून शहरासाठी लागणारी 80 मेगा वॅट सौरऊर्जा निर्माण करण्यात येईल.

सरकारी इमारतींवर सोलर पॅनल बसविण्यात येणार आहेत. ज्या व्यावसायिक आस्थापने, कॅसिनो इत्यादींसाठी छतावर सौरऊर्जा निर्मिती करणे शक्य नाही ते इतर कोणत्याही ठिकाणी सौरऊर्जा निर्मितीचा पर्याय निवडू शकतात आणि त्यातून निर्माण होणारी वीज ग्रीडमध्ये हस्तांतरित केली जाईल."