पर्यटकांचे आकर्षण असलेल्या साळावली आणि अंजुणे धरणाचे सौंदर्य वाढणार, मंत्री शिरोडकरांनी दिली माहिती

Salaulim Anjunem Dam प्रसिद्ध साळावली आणि अंजुणे धरण पाहण्यासाठी पर्यटक गर्दी करत आहेत. पर्यटक आणि गोंयकारांसाठी आकर्षण असलेल्या या धरणांच्या सौंदर्यात भर टाकण्यासाठी विद्युत रोषणाई केली जाणार असल्याची माहिती मंत्री सुभाष शिरोडकरांनी माहिती सभागृहात दिली आहे.

यामुळे दोन्ही धरणे अधिक सुंदर आणि आकर्षक दिसतील व अधिक पर्यटकांना आकर्षित करतील यात शंका नाही.

जलस्त्रोत मंत्री सुभाष शिरोडकरांनी यांनी मागण्या आणि कपात सत्रात उपस्थित केलेल्या विविध प्रश्नांवर उत्तरे दिली. यावेळी त्यांनी सर्व मतदारसंघातील आमदारांच्या मागण्या पूर्ण करण्यासाठी प्रयत्नशील असल्याची ग्वाही दिली. तसेच, माझ्या खात्यात नाही हा शब्द सापडणार नाही, मागील 40 वर्षात मी कोणालाच नाही म्हटले नाही. असे शिरोडकरांनी स्पष्ट केले.

प्रत्येक मतदार संघात किंवा ग्रामपंचायत स्तरावर देखील जल संवर्धन करण्यासाठी प्रत्येकाने प्रयत्न करण्यास हरकत नाही. त्यासाठी नेहमीच समर्थन असल्याचे शिरोडकर म्हणाले.

दरम्यान, यावेळी मंत्री शिरोडकरांनी राज्यातील धरणे पर्यटकांसाठी आकर्षण ठरत आहेत. विशेषत: दक्षिणेतील साळावली धरणाला अनेक स्थानिक आणि पर्यटक भेट देत आहेत. दररोज हजार बाराशे लोक येथे जात आहेत.

या धरणांचे सौंदर्य वाढविण्यासाठी येत्या शनिवारी साळावली आणि अंजुणे धरणावर विद्युत रोषणाई करणार असल्याची माहिती मंत्री सुभाष शिरोडकरांनी दिली.