Goa Assembly Monsoon Session: टोमॅटो दरवाढ विधानसभेत! सरदेसाई म्हणाले मोफत वाटा, नाईक म्हणतात झळ नाही

Goa Assembly Monsoon Session 2023 Live Update

देशात सर्वत्र टोमॅटोचे दर गगनाला भिडले आहेत. प्रति किलो 150 रूपयांच्या जवळ टोमॅटोची विक्री होत आहे. गोव्यात देखील टोमॅटो दरवाढीचा फटका गोव्यातील जनतेला देखील बसत आहे. हाच प्रश्न फातोर्डाचे आमदार विजय सरदेसाई यांनी आजपासून सुरू झालेल्या विधानसभा पावसाळी अधिवेशात उपस्थित केला. त्यावर राज्याचे कृषीमंत्री रवी नाईक यांनी जनतेला टोमॅटो दराबाबत आश्वस्त केले आहे.

विजय सरदेसाई यांनी प्रश्नोत्तराच्या तासात टोमॅटोच्या दराबाबत प्रश्न उपस्थित केला. 'टोमॅटोचे दर प्रति किलो 140 रुपये झालेत. हा दर सामान्य गोवेकरांच्या हाताबाहेर गेला आहे. आता सरकारनेच प्रत्येक गोवेकराला दोन किलो टोमॅटो मोफत देण्याची सोय करावी.' असे सरदेसाई म्हणाले.

याबाबत उत्तर देताना गोव्याला टोमॅटो दरवाढीचा फटका बसणार नाही अशी ग्वाही कृषीमंत्री रवी नाईक यांनी विधानसभेत दिली. 'फलोत्पादन खात्याकडून बाहेरुन टोमॅटो आणून गोव्यात कमी दराने विकले जात आहेत. त्यामुळे वाढीव दराचा फटका गोव्यातील जनतेला बसणार नाही. असे स्पष्टीकरण नाईक यांनी दिले.

दोषींवर कारवाई होणारच

मुख्यमंत्री प्रमोद सावंत यांनी कला अकादमीच्या खुल्या रंगमंचाचे छत कोसळल्याप्रकरणी स्पष्टीकरण देताना याप्रकरणी दोषींवर कारवाई होणारच अशी ग्वाही दिली. याबाबत बांधकाम खाते तपासणी करत आहे. तसेच, याची आयआयटी रुरकीच्या माध्यमातून तपासणी केली जाणार असल्याचेही त्यांनी सांगितले. बांधकाम मंत्री काब्राल देखील याबाबत श्वेतप्रत्रिका काढणार असल्याची माहिती यावेळी सावंत यांनी दिली.