Vijay Sardesai: विधानसभेत प्रश्‍न मांडण्यास विरोधकांना यश, आता प्रतिक्रियांसाठी लोकांसमोर जाणार

Vijay Sardesai विधानसभेमध्ये विरोधी आमदारांचे संख्याबळ कमी असले, तरी सरकारचे अनेक घोटाळे आणि कारनाम्यांचा पर्दाफाश करण्यास तसेच लोकांच्या अनेक समस्या, प्रश्‍न मांडण्यास विरोधकांना यश आले.

या सरकारने लोकांची दिशाभूल करून गोवा विक्रीस काढला आहे. चार वर्षानंतर 18 दिवसांच्या कार्यकाळ असलेले हे अधिवेशन असल्याने विरोधकांना लोकांचे प्रश्‍न मांडण्यास वेळ मिळाला, अशी माहिती पक्षाचे अध्यक्ष व आमदार विजय सरदेसाई यांनी दिली.

ते पुढे म्हणाले, विधानसभेत मांडण्यात आलेल्या लोकांच्या समस्या व प्रश्‍नाबाबत ते समाधानी आहेत की नाही, याची माहिती घेण्यासाठी गोवा फॉरवर्ड पक्ष लोकांसमोर जाणार आहे. त्यासंदर्भातचा कार्यक्रम लवकर जाहीर केला जाईल,

पक्षाची राज्य कार्यकारी समितीची बैठक पणजीतील पक्षाच्या कार्यालयात आमदार विजय सरदेसाई यांच्या अध्यक्षतेखाली झाली. त्यानंतर त्यांनी घेतलेल्या पत्रकार परिषदेला त्यांच्यासोबत सरचिटणीस प्रशांत नाईक व उत्तर गोवा जिल्हा अध्यक्ष दीपक कळंगुटकर उपस्थित होते.

या बैठकीत घेण्यात आलेल्या निर्णयासंदर्भात माहिती देताना सरदेसाई म्हणाले, की विधानसभेमध्ये लोकांच्या समस्या व प्रश्‍न मांडण्यासाठी नागरिकांना आवाहन केले होते, त्याला चांगला प्रतिसाद लाभला होता.

त्यांचे अधिकाधिक प्रश्‍न मांडण्यात होते. लोक पक्षाकडे प्रश्‍न व समस्या घेऊन आले. त्यांचे प्रश्‍न व समस्या मांडण्यात आल्या, त्यावर त्यांच्या प्रतिक्रिया ऐकून घेण्यासाठी त्यांच्याकडे पक्ष जाईल.

या विधानसभेत दरदिवशी एक घोटाळा याप्रमाणे सुमारे १८ घोटाळे अधिवेशनात मांडण्यात आले. कला अकादमी घोटाळ्याने सुरू होऊन ‘खेलो इंडिया’ या विषयाने ते संपले. नागरीपुरवठा खात्यातील निकृष्ट दर्जाच्या तांदळाचे वितरण तसेच जमिनींचे रूपांतरण, आयटी प्रकरणे अशी अनेक प्रकरणे उघडकीस आणण्यात आली.

त्यावर सरकारला स्पष्टीकरण व उत्तरे देण्यास अपयश आले. कोणत्याही विचाराविना काही विधेयके मंजूर करण्यात आली आहेत. त्यामुळे त्याचा मोठा परिणाम गोव्यावर होणार आहे. त्यामुळे झालेले नुकसान भरून काढणे शक्य नाही.

विरोधकांनी सरकारविरोधात अधिवेशनात लढा दिला. आता लोकांच्या मदतीने कृती आराखडा तयार करून राज्यात पुन्हा लढा उभारण्यात येईल.

फॉरवर्ड पक्ष हा सासष्टी क्षेत्रापुरताच नाही, तर संपूर्ण गोव्यासाठी आहे. त्यामुळे येत्या बुधावर १६ ऑगस्टपासून पणजीतील पक्षाच्या कार्यालयात सकाळी १० वाजल्यापासून लोकांना भेटण्यासाठी उपस्थित आपण राहणार आहे. त्यांच्या समस्या व प्रश्‍न ऐकून घेणार आहे, असे सरदेसाई म्हणाले.