Goa Assembly New Speaker: 32 विरुद्ध 07 ! गणेश गावकर झाले गोवा विधानसभेचे नवे सभापती, डिकॉस्तांचा पराभव

पणजी: सावर्डेचे आमदार गणेश गावकर यांची गोवा विधानसभेच्या सभापतीपदी निवड झाली आहे. त्यांना ३२ मते मिळाली. त्यांच्याविरोधात अर्ज दाखल केलेल्या काँग्रेसच्या एल्टन डिकॉस्ता यांना विरोधी पक्षातील आमदारांची सात मते मिळाली. सभापतीपदाच्या निवडीसाठी आज (२५ सप्टेंबर) एक दिवसाचे विशेष अधिवेशन बोलवण्यात आले होते.

रमेश तवडकरांनी राजीनामा दिल्यानंतर सभापतीपद रिक्त झाले होते. रमेश तवडकर आणि दिगंबर कामत यांंनी मंत्रीपदाची शपथ घेतल्यानंतर नव्याने सभापतीपदी कोण विराजमान होणार या चर्चांना उधाण आले होते. रमेश तवडकर यांच्या रुपाने एसटी समाजातील नेता सभापती पदावर विराजमान होता त्यामुळे नव्याने एसटी नेत्याकडेच हे पद जाणार अशी चर्चा होती. यानंतर लगेच गणेश गावकर यांचे नाव समोर आले होते.

“पूर्वी चालत होते त्याप्रमाणे राजकीय किंवा पक्षपातीपणे सभापतींनी सभागृह चालवू नये. गावकरांनी त्यांचा अनुभव चांगल्या गोष्टी करण्यासाठी वापरावा”, अशा शब्दात विरोधी पक्षनेते युरी आलेमाव यांनी गणेश गावकरांनी शुभेच्छा दिल्या.

तर, “सभापतींनी केवळ सत्ताधाऱ्यांच्या बाजुने उभं राहू नये, आम्ही विरोधी पक्षातील नेते लोकांचे मुद्दे उपस्थित करत असतो, त्यामुळे आम्हालाही समान संधी मिळावी”, असे मत आरजीचे आमदार वीरेश बोरकर यांनी मांडले.