Goa Assembly Session: ‘आदिवासीबहुल' असा तिसरा जिल्हा व्हावा; सभापतींचे मत

पणजी: आदिवासीबहुल असा तिसरा जिल्हा व्हावा, असे मत सभापती रमेश तवडकर यांनी व्यक्त केले आहे. विकासासाठी केपे मुख्यालय ठेवून सांगे, केपे, काणकोण आणि धारबांदोडा तालुक्याचा मिळून हा जिल्हा वसावा, असे मत त्यांनी व्यक्त केले आहे.

पत्रकारांनी विचारलेल्या प्रश्नावर उत्तर देताना ते म्हणाले, तिसरा जिल्हा हा विषय चर्चेत आहे. प्रत्येकाला याबाबत मत मांडण्याचा अधिकार आहे. आदिवासीबहुल असा हा आमचा भाग आजवर विकासापासून वंचित राहिलेला आहे. त्या भागामध्ये विकासाला चालना देण्यासाठी तिसरा जिल्हा केपे येथे मुख्यालय ठेवून व्हावा, अशी आमची मागणी आहे.

दरम्यान, वाहतूकमंत्री माविन गुदिन्हो यांनी आपल्याला निनावी धमकी मिळाल्याची तक्रार दिली आहे, असे त्यांनी सांगितले.

त्याविषयी पोलिसांनी संशयिताला शोधून काढल्यानंतर त्याच्याविरुद्धची कारवाई हक्कभंग समितीकडे सोपविण्यात येईल, अशी माहिती त्यांनी दिली.