Navelim Truck Accident: चालकाचे नियंत्रण गेले, ट्रक घुसला घरात! छपरासह कुंपणाची मोडतोड; चालक जखमी

डिचोली: चालकाचे स्टेअरिंगवरील नियंत्रण गेल्याने ट्रक चक्क रस्त्याला टेकून असलेल्या कुंपणाला धडकून घरात घुसला. हा अपघात आमोणे-साखळी रस्त्यावरील न्हावेली येथे सोमवारी श्री आजोबा मंदिराच्या मागच्या बाजूने घडला.

या अपघातात घराच्या छपरासह कुंपणाची मोडतोड होऊन ट्रकचालक किरकोळ जखमी झाला. मात्र, अन्य कोणताच अनर्थ घडला नाही.या अपघातात ट्रकाची किरकोळ मोडतोड मिळून हजारो रुपयांचे नुकसान झाले, अशी माहिती मिळाली आहे. हा जीए-०१-यू-३२७५ या नोंदणी क्रमांकाचा ट्रक सरळ उजव्याबाजूने रस्त्याबाहेर गेल्याने हा अपघात घडला.

स्थानिक नागरिकांनी तात्काळ मदत करत पोलिसांना माहिती दिली. पुढील चौकशी साखळी पोलिस करीत आहेत. या अपघातामुळे रस्त्यावरील काही काळ वाहतूक विस्कळीत झाली होती.

गोव्‍यातील वारकरी अपघातात जखमी

पंढरपूरहून गोव्यात परतणाऱ्या वारकऱ्यांची मोटारगाडी आजरा-कोल्हापूर महामार्गावर पलटी होऊन झालेल्या अपघातात हातुर्ली-मये येथील ४ वारकरी जखमी झाले. त्‍यात तीन महिला असून दोघींना गंभीर दुखापत झाली आहे. सोमवारी पहाटे साडेतीनच्या सुमारास हा अपघात घडला.