Goa Agriculture : दुऱ्याची कोंड, धावे येथील पुरण शेतीची आज कापणी

Goa Agriculture :

पणजी, दुऱ्याची कोंड, धावे येथे पुरण शेतीची कापणी रविवारी (ता.२६) केली जाणार आहे. पुरण शेती ही नदीच्या पात्रात केली जाते. ती पद्धती लुप्त होत चालल्याने गेले पाच महिने परिश्रम घेऊन यंदा पुरण शेती लावण्यात आली होती. कापणीच्या समारंभास गोवा विद्यापीठाचे कुलगुरू प्रो. हरीलाल मेनन उपस्थित राहणार आहेत.

गोवा जैव विविधता मंडळ आणि विद्यापीठाची कोकणी अध्ययन शाखा यांनी या कार्यक्रमाचे आयोजन केले आहे. सकाळी १०.३० वा. होणाऱ्या या कार्यक्रमाला किनारी कृषी संशोधन संस्थेने संचालक डॉ. प्रवीण कुमार, मंडळाचे सदस्य सचिव डॉ. प्रदीप सरमोकादम उपस्थित राहणार आहेत. विद्यापीठाचे सहयोगी प्राध्यापक डॉ. प्रकाश पर्येकर यांनी पुढाकार घऊन हा उपक्रम राबविला आहे.

या उपक्रमांतर्गत पुरण शेतीसंदर्भातील संशोधित माहिती, छायाचित्रे आणि चलचित्राद्वारे तिचे दस्तऐवजीकरण करून ते जनतेला उपलब्ध करण्यात येणार असून पुरण शेतीच्या विविध टप्प्यांची नोंद आणि चित्रीकरण करण्यात आले आहे.

या कार्यक्रमाला कोकणी अध्ययन शाखेचे संचालक डॉ. हनुमंत चोपडेकर, रसायनशास्र महाशाळेचे उपअधिष्ठाता प्रो. सुंदर धुरी, मनोहर पर्रीकर स्कूल ऑफ लॉ, गवर्नन्स आणि पब्लिक पॉलिसी महाशाळेचे अधिष्ठाता प्रो. राजेंद्र गाड, सत्तरीचे विभागीय कृषी अधिकारी विश्वनाथ गावस आदी उपस्थित राहणार आहे. तसेच पुरण शेतीत प्रत्यक्ष काम करणारे गणेश पर्येकर, तुळशीदास गावकर, विठोबा पिंगळे, राज्य जैवविविधता मंडळाचे सदस्य, संशोधक, शिक्षक वर्ग, विद्यार्थी व त्या भागातील पुरण शेतकरी या कार्यक्रमाला उपस्थित राहणार आहेत.

शेती टिकली पाहिजे!

एकेकाळी अत्यंत लोकप्रिय आणि राज्यभरात वापरले जाणारे ‘पुरण शेती’ हे कृषी तंत्र आज नामशेष होण्याच्या मार्गावर आहे. सत्तरी, धारबांदोडा आणि डिचोलीमधील भूमीहीन शेतकऱ्यांसाठी एकेकाळी पुरणशेती किंवा गाळावर आधारित शेती हे मुख्य उदरनिर्वाहाचे साधन होते. यामध्ये केवळ सेंद्रिय खताचा वापर केला जायचा.

मात्र, गोव्यातील बांधकामे आणि विकासामुळे अनेक शेतकऱ्यांनी ही प्रथा कायमची सोडली. आता ही पारंपरिक शेती टिकली पाहिजे, असे पर्यावरणप्रेमींचे मत आहे.