Goa Accident: ड्रायव्हरचा डोळा लागला अन् कार रस्त्यावरून थेट जंगलात घुसली; शिवोली-म्हापसा मार्गावरील घटना

Goa Accident: गोव्यात गुरूवारी 30 नोव्हेंबर रोजी पहाटेच्या वेळी एका कारचा विचित्र अपघात झाल्याची घटना समोर आली आहे. ड्रायव्हरचा डोळा लागल्याने ही कार थेट जंगलात घुसली. सुदैवाने या अपघातात जीवितहानी झालेली नाही.

पण, कारचे मात्र नुकसान झाले आहे. या गाडीतून संभा रेडकर हे त्यांच्या दोन मुलांसह प्रवास करत होते. भावाला सोडून परत येत असताना हा अपघात झाला.

पेडणे तालुक्यातील कोरगाव येथील रेडेकर कुटूंबीय हे त्यांच्या टोयोटा ग्लान्झा (GA 11 A 4787) या कारमधून शिवोलीतून म्हापसाकडे येत होते. या वेळी गाडीत तिघेजणच होते. यात त्यांच्या 15 वर्षीय मुलगाही होती.

दरम्यान, पहाटे पाच वाजण्याच्या सुमारास या मार्गावरून जात असताना ड्रायव्हरचा डोळा लागल्याने ही कार मार्ग बदलून थेट जंगलातच घुसली. काही वेळातच सर्वांच्यात काय घडले आहे ते लक्षात आले. सुदैवाने ही कार फार धोकादायक स्थितीत नव्हती.

या घटनेची माहिती मिळताच पोलिसांनी घटनास्थळी धाव घेतली. दरम्यान, या अपघातात कारमधील कुणालाही काहीही दुखापत झालेली नाही. तथापि, गाडीचे मात्र नुकसान झाले आहे. गाडीचा बंपर फुटला आहे.