Goa Accident: भरधाव वाहनाच्या धडकेत गाईसह 4 वासरांचा मृत्यू; पांजरखणी कुंकळी येथे पहाटे अपघात

Goa Accident: मडगाव-काणकोण महामार्गावर पांजरखणी कुंकळी येथे झालेल्या अपघातात एका गाईसह चार वासरांचा मृत्यू झाला आहे. आज मंगळवारी पहाटे ही बाब लक्षात आली. अज्ञात वाहनाने या जनावरांना धडक दिल्याचे दिसते.

ही भटकी जनावरे आहेत. त्यांच्यावर अद्याप तरी कुणीही मालकी सांगितलेली नाही. मंगळवारी पहाटे ही जनावरे रस्त्यावरच मृतावस्थेत पडून होती. सकाळी स्थानिक नागरिकांनी ती रस्त्याच्या बाजूला आणली.

स्थानिकांनी या प्रकाराबाबत तीव्र नाराजी व्यक्त केली आहे. येथे वारंवार असे अपघात घडत असतात. त्यामुळे पालिकेने ठोस काहीतरी कारवाई करावी, अशी मागणी स्थानिकांमधून होत आहे.

दररोजचा त्रास असूनही पालिका काहीही कारवाई करत नाही. भटक्या जनावरांना पकडण्यासाठी खास कर्मचाऱ्याची नेमणूक करण्यात आली आहे. तसेच येथे भटक्या जनावरांसाठी कॅटल पाँडदेखील आहे.

दरम्यान, स्थानिक नागरिक अॅड. रेश्मा देसाई म्हणाल्या की, हे आता खूप झाले आहे. दररोज असे प्रकार घडत असतात. दररोज अपघात होत असतात. नगरपालिकेने काहीतरी ठोस कारवाई करावी. आज चार ते पाच जनावरांचा अपघाती मृत्यू झाला आहे. याविरोधात कडक कारवाई झाली पाहिजे.