Solapur Accident: क्षणभर विश्रांती ठरली अखेरची; वारकरी महिलेचा अपघाती मृत्यू

आषाढी एकादशीनिमित्त अस्नोड्यामधून पायी वारीतून पंढपूरला गेलेल्या रेवोडा येथील ६५ वर्षीय गौरी कुडतरकर यांचा सोलापूर मार्गावर अपघातात करुण अंत झाला. चालून पाय दुखू लागल्याने क्षणभर विश्रांतीसाठी बसलेल्या वाहनावरच पाठीमागून ‘कार’रूपी काळाने घाला घातला.

या अपघातास कारणीभूत ठरलेला चालक अर्शिद पारिड्डा याला अटक केली आहे. या अपघाताची बातमी समजताच कुटुंबीयांनी अपघातस्थळी धाव घेतली. गौरी कुडतरकर या अस्नोडा ते पंढरपूर पायी वारीसाठी बुधवार, ३ जुलैला इतर वारकऱ्यांसोबत निघाल्या होत्या. मात्र, ही वारी त्यांच्यासाठी अखेरची ठरली. शुक्रवारी (ता.१२ जुलै) सकाळी १०.३०च्या सुमारास सोलापूर महामार्गावर हा भीषण अपघात घडला.

गौरी कुडतरकर या सहकारी सुरेखा शिरोडकर यांच्यासह गाडीत विश्रांतीसाठी बसल्या. ही गाडी रस्त्याशेजारीच उभी केली होती. चालक साबाजी गाड हेही गाडीत होते. त्यावेळीच दुसऱ्या भरधाव कारने त्यांच्या वाहनाला जोरदार धडक दिली. यात गौरी यांचा मृत्यू झाला, तर सुरेखा आणि साबाजी हे जखमी झाले.

विठ्ठल दर्शनापूर्वीच वारी ठरली अखेरची

गौरी कुडतरकर यांनी गेल्या वर्षीही आषाढी एकादशीनिमित्त पंढरपूरला पायी वारी केली होती. यंदाची त्यांची दुसरी वारी अखेरची ठरली. ७० जणांचे वारकरी मंडळ अस्नोड्याहून पायी दिंडीत सहभागी झाले होते. मात्र, विठूरायाचे दर्शन घेण्यापूर्वीच कुडतरकर यांचे आकस्मिक जाणे सगळ्यांच्या मनाला चटका लावून गेले.

गोव्यात होणार अंत्यसंस्कार

कुडतरकर या विठ्ठलाच्या भक्त असून, घरी हरिपाठ उपासना करायच्या. यंदाचे हे वारीचे दुसरे वर्ष होते. सामाजिक कार्यात त्या सक्रिय असायच्या. पतीचे निधन झाले असून, त्यांना एक मुलगा आणि तीन मुली आहेत. गौरी यांच्या पार्थिवावर गोव्यात अंत्यसंस्कार करण्यात येणार आहेत.