गवळी, धनगर समाजाला 'अनुसूचित जमातीचा' दर्जा मिळवून देणार का; बाबू कवळेकर

पिसुर्ले: गेल्या कित्येक वर्षांपासून रेंगाळत असलेल्या राज्यातील गवळी, धनगर समाजाला अनुसूचित जमातीचा दर्जा मिळवून देण्यासाठी राज्याचे उपमुख्यमंत्री तथा समाजाचे नेते बाबू कवळेकर यांनी पुढाकार घेतला असून, मुख्यमंत्री डॉ प्रमोद सावंत यांच्या मार्गदर्शनाखाली त्यांनी आज नवी दिल्ली येथील गृहखात्याच्या अतंर्गत येणाऱ्या आरजीआय रजिस्टर जनरल ऑफ इंडिया या संस्थेचे प्रमुख विवेक जोशी व इतर अधिकाऱ्यांची भेट घेऊन त्यांच्याशी धनगर समाजाच्या विषयांवर सविस्तर चर्चा केली.

यावेळी त्यांच्या समवेत राज्यातील आय ए. एस अधिकारी राजशेखर रेड्डी, या विषयी पाठपुरावा करण्यासाठी सरकारने नेमलेले निवृत्त अधिकारी एन डी अगरवाल, समाजाचे डॉ जानू झोरे, चंद्रकांत शिंदे आदी उपस्थित होते. यावेळी त्यांच्याने केंद्रीय गृह खात्याचे सचिव अजय कुमार भल्ला यांची भेट घेऊन त्यांच्याशी चर्चा केली आहे, या चर्चेत त्यांच्या कडून सकारात्मक प्रतिसाद मिळाला असल्याची माहिती मिळाली असून त्यामुळे येणाऱ्या काळात राज्यातील गौळी धनगर समाजाला चांगले दिवस येण्याची आशा निर्माण झाली आहे.