फोंड्याला कचरामुक्त करण्याची नागरिकांची मागणी

फोंडा : गोव्यात सध्या ठिकठिकाणी कचऱ्याचा प्रश्न ऐरणीवर आला आहे. फोंडा शहरातही अनेक ठिकाणी कचऱ्याचे ढीग दिसू लागले आहेत. यामुळे सामाजिक आरोग्य धोक्यात येण्याची भीती व्यक्त केली जात आहे. आजारांच्या धोक्यासह दुर्गंधीचाही सामना नागरिकांना करावा लागत आहे. (Garbage in Ponda News Updates)

फोंडा (Ponda) पालिकेसह आसपासच्या ग्रामपंचायतींकडून स्वच्छतेसाठी प्रयत्न केले जात आहेत. मात्र असं असलं तरीही परिसरातील कचऱ्याची समस्या जैसे थे असल्याचं चित्र आहे. पर्यटकांकडूनही बेजबाबदार वर्तन कचरावाढीस कारणीभूत ठरत असल्याचं दिसून आलं आहे. फोंडा कदंब बस स्थानकापासून ते फर्मागुडीपर्यंतच्या रस्त्याशेजारी सातत्याने कचरा टाकला जातो. शनिवारी-रविवारी अनेकजण आपल्या घरातील कचरा किंवा टाकावू वस्तू फेकण्यासाठी या ठिकाणी येतात. त्यामुळे कचऱ्याची (Garbage) समस्या कमी होताना काही दिसत नाही.

या परिसराची नियमितरित्या साफसफाई होत नसल्याने कदंब स्थानकाजवळ कचऱ्याचे ढीग पाहायला मिळत आहेत. जर हा कचरा उचलला गेला नाही, तर याचा दुसरा सोनसोडो (Sonsodo) व्हायला वेळ लागणार नाही अशी भीती व्यक्त केली जात आहे. यासोबतच नागरिकांच्या आरोग्याचा प्रश्नही ऐरणीवर आला आहे. प्रशासनाने या भागात गस्त वाढवून कचरा टाकणाऱ्यांवर कारवाई करण्याची मागणी केली जात आहे. तसंच दंडात्मक कारवाई करण्याची मागणीही नागरिकांकडून केली जात आहे.