Calangute: कळंगुटमध्ये कर्नाटकातील पाच चोरांच्या टोळीला अटक; 10 मोबाईलसह सोन्याची चेन जप्त

Calangute: सध्या नुतन वर्षाच्या पार्श्वभुमीवर राज्यात मोठ्या संख्येने पर्यटक दाखल झाले आहेत. त्यामुळे राज्यातील विविध समुद्र किनाऱ्यांवर मोठी गर्दीही होत आहे. याच गर्दीचा फायदा घेत चोरट्यांनी पर्यटकांच्या खिशावर डल्ला मारण्याचे प्रकार घडत आहे. शुक्रवारी कळंगुट पोलिसांनी पाच चोरट्यांना अटक केली आहे. त्यांच्याकडून 10 मोबाईल फोनसह सोन्याच्या साखळीचे तुकडेही जप्त केले आहेत.

राम भौमिक, अनिल रामु राठोड, संजीव सिंग, सनी साहो आणि योगेश देवानिया अशी ताब्यात घेतलेल्यांची नावे आहेत. हे सर्व मुळचे कर्नाटकचे रहिवाशी आहेत. त्यांच्याकडून सुमारे पाच लाख रूपयांचा मुद्देमाल पोलिसांनी जप्त केला आहे.

दरम्यान, कळंगुट पोलिसांनी महाराष्ट्राच्या दोन टोळ्यांतील 12 जणांनाही गजाआड केले होते. त्यांच्याकडून अनेक आयफोनसह 41 मोबाईल जप्त केले आहेत. उत्तर गोवा पोलिस अधीक्षक निधीन वाल्सन यांनी सांगितले की, सनबर्न ईडीएमला ड्रग्ज तसेच मोबाईल चोऱ्यांचे प्रकार होत असल्याने दहा वेगवेगळी साध्या वेशातील पोलिस पथके किनारपट्टी भागात तैनात केले आहेत. महाराष्ट्रातील हे चोरटे बागा येथील एका हॉटेलात राहत होते. ते एका इनोव्हा गाडीने गोव्यात आले होते ती गाडीही जप्त केली आहे. या टोळीत सुमारे 25 जण असून इतरांचा शोध घेण्यात येत आहे, असे वाल्सन यांनी सांगितले.