G-20 Summit: अभिमानास्पद ! जी-20 शिखर परिषदेच्या काही बैठका गोव्यात होणार

Goa Politics: भारतीय जनता पक्षाच्या मडगाव मंडळाने भारताला मिळालेल्या जी-20 शिखर परिषदेच्या अध्यक्षपदासाठी पंतप्रधान नरेंद्र मोदी यांचे अभिनंदन तसेच या शिखर परिषदेसंदर्भात लोकांमध्ये जागृती करण्यासाठी काल मडगाव नगरपालिकेच्या इमारतीसमोर कार्यक्रम आयोजित केला होता.

भारताला अध्यक्षपद मिळाले ही सर्व भारतीयांसाठी अभिमानाची गोष्ट आहे. गोव्यात कित्येक वर्षांनी जी-20 शिखर परिषदेच्या काही बैठका होणार आहेत, ही गोमंतकीयांसाठी उत्साहवर्धक गोष्ट असल्याने नगराध्यक्ष दामोदर शिरोडकर यांनी सांगितले.

या कार्यक्रमाला उपनगराध्यक्ष दीपाली सावळ, नगरसेवक महेश आमोणकर, भाजप मडगाव मंडळाचे अध्यक्ष रूपेश महात्मे, पक्षाचे प्रवक्ते शर्मद रायतुरकर, मडगाव भाजप महिला मोर्चाच्या अध्यक्षा तनुजा पैंगीणकर व फातोर्डाच्या अध्यक्ष आशा गावस उपस्थित होते.

जग एक आहे, असे पंतप्रधान मोदीजी मानतात. नगरपालिकेसमोर काढण्यात आलेल्या रांगोळीत पृथ्वी रेखाटलेली आहे तसेच वसुधैव कुटुंबम: असे लिहिले आहे. - रंजिता पै, भाजप महिला मोर्चाच्या सरचिटणीस