Leopard In Bicholim : डिंगणे-सुर्ल भागात बिबट्याचे पुन्हा दर्शन; लोक भयभीत

Leopard In Goa: मुळगाव येथे दहशत माजवलेल्या बिबट्याला जेरबंद करण्यात वन खात्याला यश आले असले, तरी डिचोलीतील काही ग्रामीण भागांत बिबट्याचा मुक्त संचार असल्याची माहिती मिळाली आहे.

मुळगाव येथे लोकवस्तीत संचार करणारा बिबट्या 14 ऑगस्ट रोजी मध्यरात्री वन खात्याने लावलेल्या पिंजऱ्यात अडकला. त्यामुळे मुळगावमधील जनता भयमुक्त झाली आहे. मात्र, दुसऱ्या बाजूने तालुक्यातील शिरगावसह डिंगणे-सुर्ल येथे बिबट्याचा संचार असल्याचे दिसून आले.

तीन महिन्यांपूर्वी डिंगणे-सुर्ल भागात लोकवस्तीत दहशत निर्माण केल्यानंतर गायब झालेल्या बिबट्याचे पुन्हा गावात वावर वाढल्याचे स्पष्ट झाले आहे. सोमवारी रात्री एका घरापर्यंत संचार करताना बिबट्या सीसीटीव्ही कॅमेऱ्यात कैद झाला आहे.

तीन महिन्यांपूर्वी हा बिबट्या त्याच घरातील सीसीटीव्ही कॅमेऱ्यात कैद झाला होता. त्यानंतर या बिबट्याला पकडण्यासाठी वन खात्याने प्रयत्नही केले होते. या बिबट्याचे पुन्हा दर्शन झाल्याने लोकांमध्ये घबराट पसरली आहे.

शिरगावातही पुन्हा संचार

शिरगावातही एका बिबट्याने गेल्या काही दिवसांपासून दहशत माजवली आहे. शिरगाव पंचायत कार्यालयाच्या जुन्या इमारत परिसरात या बिबट्याचा संचार असल्याची माहिती मिळाली. बिबट्याच्या संचारामुळे स्थानिक जनतेमध्ये भीती पसरली आहे.

आतापर्यंत या बिबट्याने सहाहून अधिक पाळीव कुत्र्यांना फस्त केले आहे. रात्री सोडाच, दिवसाही हा बिबटा लोकवस्तीजवळ संचार करीत असल्याची माहिती मिळाली आहे.