Bicholim Fraud Case: ‘मास्टरमाईंड’ कॉन्स्टेबल अखेर पोलिसांच्या ताब्यात; ‘ती’ महिला मात्र अजून गायब

डिचोली: नोकरीचे आमिष दाखवून अनेकांना गंडा घातलेली ‘ती’ संशयित महिला अद्याप फरार असून, पोलिस तिचा शोध घेत असल्याची माहिती मिळाली आहे. या महिलेचा साथीदार आणि या कारनाम्यामागील ‘मास्टरमाईंड’ पोलिस कॉन्स्टेबल रोहन वेंझी याला पोलिसांनी ताब्यात घेतले आहे. त्याची जबानीही घेतल्याची माहिती मिळाली आहे. मात्र, त्याने जबानीत नेमकी कोणती माहिती दिली, ते समजू शकले नाही.

‘प्रिया’नामक संशयित महिलेने केवळ डिचोलीतच नव्हे, तर अन्य भागांसह शेजारील राज्यातही अनेकांना इंगा दाखवल्याचे बोलले जात आहे. रेल्वेत नोकरी देण्याचे आमिष दाखवून तिने अनेकांना चुना लावल्याची माहिती मिळाली आहे. पोलिसही त्यादृष्टीने तपास करीत आहेत. संशयित महिला पोलिसांच्या जाळ्यात अडकल्यानंतरच या प्रकरणाचा भांडाफोड होण्याची शक्यता आहे.

सभ्यपणाचा आव आणून गंडा

प्रिया सभ्यपणाचा आव आणत होती. समोरच्या व्यक्तीशी ती ज्या पद्धतीने सहज संवाद साधत असायची, त्यावरून संशयित महिलेबाबत कोणालाही किंचितही संशय येत नव्हता. या महिलेने अनेकांकडून व्याजाने पैसे घेऊन त्याची वेळेवर परतफेड केली होती. तिने तिच्या संपर्कातील महिला आणि अन्य लोकांचा विश्वास संपादन केला होता.