Dharbandora: पेटके - धारबांदोडा येथे चार डुक्करांची कत्तल, चौकशीसाठी दोन संशयित ताब्यात

पेटके - धारबांदोडा येथे चार डुक्करांची कत्तल करण्यात आली आहे. वन परिक्षेत्र अधिकाऱ्यांनी या ठिकाणी जाऊन पाहणी केली असता, त्यांना 13 डुक्कर जिवंत सापडले तर, चार डुक्करांची कत्तल करण्यात आली होती. पोलिस देखील घटनास्थळी दाखल झाले असून, चौकशीसाठी दोन संशयितांना ताब्यात घेण्यात आले आहे.

दरम्यान, मांस विक्रीसाठी डुक्करांची कत्तल केली जात असल्याची प्राथमिक माहिती समोर आली आहे.

वन परिक्षेत्र अधिकारी (Range Forest Officer) नारायण प्रभुदेसाई यांनी दिलेल्या माहितीनुसार, पेटके - धारबांदोडा येथील सर्व्हे नंबर 206 याठिकाणी रानटी डुक्कर आणून त्यांची कत्तल केली जात असल्याची माहिती वन खात्याच्या अधिकाऱ्यांना मिळाली.

अधिकाऱ्यांनी तात्काळ येथे छापा टाकून पाहणी केली असता, त्यांना चार डुक्करांची कत्तल केल्याचे आढळून आले. तसेच, त्यांचे मांस सर्वत्र पडले होते आणि काही मांस प्लॅस्टिक पिशवी व बॅरलमध्ये साठवून ठेवण्यात आल्याचे पडताळणीत दिसून आले.

शिवाय येथे 13 डुक्कर जिवंत सापडले आहेत. डुक्करांची वैद्यकीय तपासणी केली जाणार असल्याची माहिती प्रभुदेसाई यांनी दिली आहे. याठिकाणावरून 80 किलो मांस जप्त करण्यात आली आहे.

अधिकाऱ्यांनी याठिकाणी छापा टाकून पाहणी केली असता, डुक्करांची मोठ्या प्रमाणावर कत्तल करून मांस इतरत्र पडल्याले दिसून येत आहे. शिवाय कत्तलीसाठी वापरण्यात आलेले विविध हत्यारे पोलिसांनी जप्त केली आहेत.

जिंवत असलेल्या डुक्करांचे पाय बांधून त्यांना एकत्र जमिनीवर ठेवण्यात आल्याचे काही व्हिडिओ समोर आले आहेत.

दरम्यान, कत्तलीसाठी आणण्यात आलेली डुक्करे गावठी की जंगली आहेत याची देखील तपासणी केली जात आहे.