Banastarim Mercedes Accident ला चार महिने उलटले! पोलिसांकडून अजूनही आरोपपत्र दाखल नाहीच...

Banastarim Mercedes Accident: बाणस्तारी येथील पुलावर झालेल्या मर्सडीज कारच्या भीषण अपघाताला 4 महिने उलटले आहेत. तरीही या प्रकरणात अद्याप पोलिसांना आरोपपत्र दाखल करण्यात यश आलेले नाही.

या अपघातात तिघांचा मृत्यू झाला होता आणि इतर तीन जण गंभीर जखमी झाले आहेत. फॉरेन्सिक अहवाल प्रलंबित असल्यामुळे आरोपपत्र दाखल करण्यात विलंब झाल्याचे सांगितले जात आहे.

रक्ताच्या डागांचे नमुने, डीएनए नमुने, कॉल डिटेल्स आणि इतर काही गोष्टी पुण्यातील सेंट्रल फॉरेन्सिक सायन्स लॅबोरेटरी (सीएफएसएल) आणि वेर्णा येथील स्टेट एफएसएलकडे पाठविण्यात आली होती, परंतु अद्याप अहवाल येणे बाकी आहे.

प्रलंबित फॉरेन्सिक अहवाल हे तपास पूर्ण होण्यास उशीर होण्याचे कारण असल्याचे पोलिस सूत्रांनी स्पष्ट केले. दरम्यान, CFSL पुणेने आधीच गुन्हे शाखेला (CB) कळवले होते की विश्लेषणास तीन महिने लागू शकतात.

दरम्यान, आमच्याकडे अजून दीड महिना बाकी आहे. आणखी उशीर झाल्यास, आम्ही चाचणीचे निकाल लवकर काढण्यासाठी CFSL ला स्मरणपत्र लिहू," अशी माहिती स्थानिक इंग्रजी प्रसारमाध्यमांना वरिष्ठ अधिकाऱ्यांनी दिली आहे.

या अपघातावेळी मेघना सावर्डेकर नाही तर तिचा पती श्रीपाद सिनाई सावर्डेकर उर्फ ​​परेश हा मर्सिडीज बेंझ चालवत होता, हे आतापर्यंतच्या तपासात सिद्ध झाले आहे.

हे दाम्पत्य प्रभावशाली घराण्यातील असल्याच्या कारणावरून पोलिसांना या प्रकरणात लपवाछपवीच्या आरोपांना सामोरे जावे लागले आहे.

6 ऑगस्ट रोजी हा अपघात झाला होता. फोंडा येथे 6 ऑगस्ट रोजी रोटरी क्लबच्या पार्टीत हे दाम्पत्य सहभागी झाले होते.

पार्टीतील बहुतेक जण मद्यधुंद होते तसेच आरोपींसह इतर कार रेसिंगमध्येही सहभागी होत होते. पार्टीनंतर कार रेसिंग करण्यातून हा अपघात झाल्याची चर्चा आहे.

अपघातानंतर आठ तासांनी म्हार्दोळ पोलिसांनी परेश याला दारूच्या नशेत बेदरकारपणे गाडी चालवल्याबद्दल अटक केली. क्राईम ब्रँच या प्रकरणाचा तपास करत आहे. या पथकात नऊ सदस्य आहेत.

दरम्यान, गणेश लमाणी नावाच्या डमी कार चालकाला सादर करून पोलिसांची दिशाभूल करण्याचा प्रयत्न केल्याच्या आरोपाखाली आम आदमी पार्टी (आप) गोवाचे अध्यक्ष अॅड. अमित पालेकर यांनाही या प्रकरणात अटक करण्यात आली होती.