माजी लष्करप्रमुख सुनिथ फ्रान्सिस रॉड्रिग्स कालवश

पणजी: माजी लष्कर प्रमुख जनरल (निवृत्त) सुनिथ फ्रान्सिस रॉड्रिग्स यांचे काल शुक्रवारी दुपारी 1.30 वाजता निधन झाले. ते 88 वर्षांचे होते. गेल्या 15 दिवसांपासून पणजीजवळच्या हॉस्पिटलमध्ये त्यांच्यावर उपचार सुरू होते. त्यांचा जन्म जरी मुंबईत झाला असला तरी त्यांचे वडील फ्रान्सिस हे मूळचे सासष्टी तालुक्यातील कुडतरी गावचे असून आई अस्नोडा येथील आहे. लष्करी सामरिक मार्गदर्शक व विचारवंत म्हणून त्यांची ओळख होती. 1990 ते 1993 दरम्यान ते लष्कर प्रमुख होते.

रॉड्रीग्स हे 2004 ते 2010 दरम्यान पंजाबचे राज्यपालही होते. त्यांच्या निधाननंतर लष्कर प्रमुख जनरल नरवणे यांच्यासह भारतीय लष्कराने त्यांना श्रद्धांजली वाहिली आहे. संरक्षण रणनीतीकार आणि विचारवंत म्हणून त्यांची ओळख होती. लष्करातून निवृत्त झाल्यानंतर सामाजिक आणि साहित्यिक वर्तुळात ते सक्रिय होते.

या ठिकाणी बजावली सेवा

रॉड्रिग्स 1949 मध्ये भारतीय लष्करी अकादमीच्या संयुक्त सेवा शाखेत सामील झाले आणि 28 डिसेंबर 1952 रोजी आर्टिलरी रेजिमेंटमध्ये नियुक्त झाले. अनेक फील्ड आणि ऑटोमॅटिक आर्टिलरी युनिट्समध्ये सेवा दिल्यानंतर, त्यांनी 1964 मध्ये आर्टिलरी एअर ऑब्झर्व्हेशन पोस्टवर पायलट प्रशिक्षणासाठी अर्ज केला आणि तोफखाना विमानचालन पायलट म्हणून पात्रता प्राप्त केली.