Gobi Manchurian Banned Goa : गोव्यात ‘गोबी मंच्युरियन'वर पुन्हा बंदी! 'एफडीए'चा निर्णय; अंमलबजावणीसाठी पालिकाही गंभीर

Gobi Manchurian Ban At Nava Somvar Utsav 2024 Bicholim Goa

डिचोली: डिचोलीतील प्रसिद्ध ‘नवा सोमवार’च्या फेरीत ‘गोबी मंच्युरियन’च्या स्टॉलना बंदी घालण्याचा निर्णय अन्न आणि औषध खात्याने (एफडीए) घेतला असून, त्यादृष्टीने कार्यवाही सुरू केली आहे. बंदीच्या या निर्णयाबाबतीत पालिकाही गंभीर आहे.

गेल्यावर्षीची पुनरावृत्ती टाळण्यासाठी या निर्णयाची कडकपणे अंमलबजावणी होण्यासाठी ‘एफडीए’सह डिचोली पालिकेनेही पावले उचलली आहेत. बंदीचा निर्णय यशस्वी होण्यासाठी ‘एफडीए’सह पालिकेचे अधिकारी ‘नवा सोमवार’च्या फेरीवर यंदा लक्ष ठेवणार आहेत, अशी माहिती मिळाली आहे.

येत्या ९ रोजी डिचोलीतील प्रसिद्ध ‘नवा सोमवार’ साजरा होणार आहे. या पार्श्वभूमीवर ‘एफडीए’च्या अधिकाऱ्यांनी बुधवारी (ता.४) डिचोली पालिकेचे मुख्याधिकारी सचिन देसाई यांची भेट घेतली. ‘नवा सोमवार’च्या फेरीत ‘गोबी मंच्युरियन’चे स्टॉल उभे राहणार नाहीत. त्यादृष्टीने पालिकेने सहकार्य करावे, अशी सूचना ‘एफडीए’च्या अधिकाऱ्यांनी पालिकेला केली आहे.

‘नवा सोमवार’च्या फेरीत ‘गोबी मंच्युरियन’च्या स्टॉलना बंदी घालण्याचा निर्णय उत्सव समितीने आधीच जाहीर केला आहे. ‘एफडीए’च्या निर्णयाला डिचोली पालिकेचेही समर्थन आहे. ‘बंदी’च्या या निर्णयाची कडकपणे अंमलबजावणी झाली, तर यंदा उत्सवाला ‘गोबी’चे स्टॉल दिसण्याची शक्यता कमीच आहे.