अन्न आनी सांस्कृतीक उत्सव पावसा उपरांतूच
2022चो गोंयचो, अन्न आनी सांस्कृतीक उत्सव जालो जाल्यार तो पावसा उपरांतूच, अशें पर्यटन मंत्री रोहन खवटेन सांगलें. गोंयचो अन्न आनी सांस्कृतीक उत्सव हो पर्यटन हंगामातलो म्हत्वाचो उत्सव आसा. दर वर्सा ह्या उत्सवाक पर्यटकांची भरपूर गर्दी पळोवपाक मेळटा. मात ह्या फावट आडवेळ्या पावसाक लागून पर्यटन खात्याक बरेंच लुकसाण जातलें. तशेंच वेपाऱ्यांक लेगीत भरपूर लुकसाण जातलें. गोंयकार तशेंच विदेशी लोक व्हडा संख्येन ह्या उत्सावक येतात मात अंदू पावसान सगल्याची वाट लायली. ह्या अवकाळी पावसाक लागून ह्या वर्साचो उत्सव फुडें धुखल्ल्याचें पर्यटन मंत्री रोहन खवटेन सांगलें.
दर्यादेगो नितळ दवरपाचे काम सारखे जायना : भोवणेकारांनी कागाळी
दर्यादेगो नितळ दवरपाचे काम सारखे जायना अश्यो कागाळी आपणांक भोवणेकारांनी तशेंच गोंयकारांनी केल्ल्यो. हे फाटभुंयेर आपणे दर्यादेग नितळ करपी कंत्राटदारांकडे खासा बसका घेंवन तांका दर्यादेगो नितळ दवरपाचो आदेश दिला अशी म्हायती पर्यटन मंत्री रोहन खंवटे हांणी दिला. पर्यटन मळावेल्या जाळवण-दारांक घेंवन एक नवीन अॅप पर्यटन खाते बेगीनुच लॉन्च करतले. आनी दर्यादेग नितळसाणीचेंर लक्ष दवरतले अशी म्हायती तांणी दिली.
गोंय घटक राज्य दिसाच्या सुवाळ्याक राष्ट्रपती रामनाथ कोविंद हांची हाजेरी
गोंय घटक राज्य दिसाच्या सुवाळ्याक राष्ट्रपती रामनाथ कोविंद हांची खाशेली हाजेरी आसतली. राष्ट्रपतींच्या हस्तुकीं नव्या राजभवन इमारतीचो बुन्यादी फातर बसयतले. आदले मुख्यमंत्री तशेंच हेर मानेस्त मेळून 35 जाणांचो राष्ट्रपती हस्तुकीं भोवमान जातलो. मुख्यमंत्री डॉ. प्रमोद सावंत हांणी पत्रकार परिशदेंत ही म्हायती दिली. गोंयांक घटक राज्याचो दर्जो मेळून 35 वर्सां जाली. ते निमतान सुवाळ्याक राष्ट्रपतींची खाशेली हाजेरी आसतली. तशेंच 25 मे दिसा आदिवासी कल्याण खात्या वरवीं प्रेरणा दीस मनयतले. सकाळीं 10.30 वरांचेर मिनेझीस ब्रागांझा सभाघरांत कार्यावळ जातली. ह्या वेळार आदीवासी समाजा मदीं उत्कृश्ठ कामगिरी करपी मानेस्तांक आदिवासी प्रज्ञा-वंत पुरस्कार भेटयतले. मुख्यमंत्री डॉ. प्रमोद सावंत हांचे सयत सभापती रमेश तवडकार, आमदार गणेश गांवकार हाजीर आसतले.
ओबीसी आरक्षणाचें प्रमाण 2017'तले वेंचणुके इतलेच आसपाची शक्यताय
2017'तले पंचायत वेंचणुकेंत ओबीसी खातीर 23.45 टक्के आरक्षण आशिल्लें. ओबीसी खातीर वट्ट 357 प्रभाग राखीव आशिल्ले. बारा ग्रामपंचायतींनी ओबीसी खातीर एकूय प्रभाग राखीव नाशिल्लो. आयोगा कडेन आशिल्ले म्हायते प्रमाण आरक्षण जालें जाल्यार आरक्षणाचें प्रमाण 2017'तले वेंचणुके इतलेच आसपाची शक्यताय आसा. मागास-वर्गीय आयोगाकडेन जी जन-गण-ना आसा, ते प्रमाण लेगीत आरक्षण निश्चीत करपाक हरकत ना. हे विशींचो निर्णय सरकार तशेंच राज्य वेंचणूक आयोगान घेवपाचो आसा अशें मागासवर्गीय आयोगाचे अध्यक्ष अॅड. मनोहर आडपयकार हांणी म्हणलें. 2013 वर्सा पुण्याच्या सेंटर फॉर प्लॅनींग, रिसर्च अॅण्ड डेव्हलोपमेंट संस्थेन ओबीसींची जन-गण-ना केल्ली. ही जन-गण-ना आयोगा कडेन आसा. 2017'तले वेंचणुकेंत हेच म्हायतीचेर आरक्षण निश्चीत जाल्ले.
पावसाक लागून पारंपारीक वांयगण शेतकारांक आर्थीक फटको
फाटल्या कांय दिसां सावन पडपी पावसाक लागून पारंपारीक वांयगण शेती करपी गरीब शेतकारांच्या शेतांचो भिजून इबाड जाला. ताका लागून तांकां आर्थीक फटको बसला. अंदूं भात-शेतीचो हंगाम उसरां सुरू जाल्ल्यान भात कापपाक सतत पडपी पावसाक लागून कळाव जालो. तीन दीस सतत पावस पडिल्ल्यान कापिल्लें भात उखलपाची संद शेतकारांक मेळूंक ना. हें भात शेतांतूच उरिल्ल्यान पावसाचें उदक तातूंत वचून ताचो मॉन्सूनपूर्व पावसाक लागून शेतांचो इबाड जाला. पूण पावसान सगळ्या कश्टांचेर उदक ओतलें. ह्या शेतकारांक बरोच अर्थीक फटको बसला. सरकारान ह्या गरीब शेतकारांक बेगीनूच लुकसाण भरपाय दिवची अशी मागणी शेतकार करपाक लागल्यात.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
