Goa Accident Case: बालरथ झाडावर आदळून पाच विद्यार्थी जखमी

Goa Accident Case: स्‍ट्रॉबेरी प्‍लांटेशन पाहायला गेलेल्‍या फोंडा येथील एका हायस्‍कूलच्‍या बालरथाला वेर्ले-नेत्रावळी येथे अपघात झाला. चालकाचा ताबा सुटल्‍याने बालरथ झाडावर आदळला. त्‍यात 25 पैकी 5 विद्यार्थी व काही शिक्षक किरकोळ जखमी झाले.

त्‍यांच्‍यावर तातडीने सांगे आरोग्य केंद्रात उपचार करण्‍यात आले. ही दुर्घटना बुधवारी सकाळी 11.30 च्‍या सुमारास घडली, अशी माहिती सांगे पोलिसांनी दिली. यासंदर्भात अधिक माहिती अशी की, सर्व शिक्षा अभियानाच्या माध्यमातून नेत्रावळी येथील स्ट्रॉबेरी फार्मला विविध शाळांतील सुमारे 20 ते 25 विद्यार्थी भेट देत होते.

वेर्ले घाट उतरत असताना बालरथाला काही अडचण आल्याने चालकाचे बसवरील नियंत्रण सुटले आणि तो एका झाडावर आदळला. सुदैवाने कुणालाही मोठी दुखापत झाली नाही. अपघातापूर्वी चालकाने बसमधील समस्यांबाबत सांगून प्रवाशांना सतर्क केले होते, असे सांगण्‍यात येत आहे.