Nerul Fire Incident: घरगुती गॅसच्या भडका होऊन माय-लेक भाजले; नेरुलमधील घटना

म्हापसा: भाटीवाडा, नेरुल येथे घरगुती गॅसच्या गळतीने भडका होऊन माय-लेक भाजले. त्यांच्यावर गोमेकॉत उपचार सुरु आहेत. ही घटना रविवारी (ता.११) सकाळी ७.४५च्या सुमारास घडली. रात्रीच्या वेळी गॅसची गळती होऊन घरात जमा झाला असावा, परिणामी सकाळी प्रज्वलन होऊन भडका उडाला, असे प्रथमदर्शनी दिसते.

जया जीवन शिरोडकर (५०) व मुलगा दिलेश शिरोडकर (२१) असे जखमींची नावे आहेत. घरातील दोन्ही सिलिंडर शाबूत आहेत. यात माय-लेक हे दोन्ही सुमारे २० टक्के भाजले आहेत.

शिरोडकर यांचे हे घर एका खोलीचेच आहे. जखमी माय-लेक घरात झोपले होते. जखमी जया ही सकाळी झोपेतून उठल्या व त्या चहा करण्यासाठी गॅस पेटवण्यासाठी गेल्या. लायटर पेटवताच आगीचा भडका उडाला अन् त्या जमिनीवर कोसळल्या. मुलगा दिलेश हा देखील भडका उडाल्याच्या आवाजाने बिचान्यावरून खाली कोसळला व दोघेही आगीत भाजले.

आगीचा भडका उडताच खिडक्यांवरील तावदाने फुटून काचा बाहेर उडाल्या तर दरवाजा तुटून बाहेर पडला. घरा शेजारील पत्राची गॅरेजचे पत्रे देखील वाकले. सुदैवाने या काचा कुणालाही लागल्या नाहीत. शिरोडकर यांच्या घरातून मोठा आवाज येताच शेजारील लोकांनी घटनास्थळी धाव घेतली.

आगीमुळे भाजून घरात जखमी अवस्थेत पडलेल्या माय-लेकाला उचलून त्यांनी कांदोळी आरोग्य केंद्रात दाखल केले. तिथून त्यांना गोमेकॉत पाठवण्यात आले. जया शिरोडकर या ३० टक्के तर मुलगा दिलेश हा २० टक्के या आगीत भाजला. घटनेची माहिती मिळताच पिळर्ण अग्निशमन दलाचे जवान तसेच पर्वरी पोलिसांनी घटनास्थळी धाव घेतली.

५ ते १० लाखांची हानी

या आगीत शिरोडकर कुटुंबीयांच्या घरातील संपूर्ण साहित्य जळाले. तसेच घराचेही मोठ्या प्रमाणात नुकसान झाले असून अंदाजे ५ ते १० लाखांची हानी या दुर्घटनेत झाल्याचा अंदाज व्यक्त करण्यात आला आहे. जखमी दोघांचीही जबानी घेतल्यानंतर नुकसानीचा आकडा स्पष्ट होणार आहे. तीन महिन्यांपूर्वी दिलेश शिरोडकर यांच्या वडिलांचे निधन झाले होते. त्यानंतर हे माता-पूत्र दोघेच घरात राहत होते.