Fire Cases in Goa : आगीच्या घटनांवर तोडगा काढण्यासाठी दक्षिण जिल्हाधिकाऱ्यांनी घेतली उच्चस्तरीय बैठक

Fire Cases in Goa : राज्यभरात आगीच्या घटनांमध्ये कमालीची वाढ झाली आहे. याच पार्श्वभूमीवर दक्षिण गोव्याचे जिल्हाधिकारी अश्विन चंद्रू यांनी बुधवारी जिल्ह्यातील वन अधिकारी आणि महसूल अधिकाऱ्यांची उच्चस्तरीय बैठक घेऊन जिल्ह्यातील आगीच्या घटनांमुळे उद्भवलेल्या परिस्थितीचा आढावा घेतला.

आगीच्या घटनांचा आढावा घेण्यासाठी बुधवारी सकाळी उपजिल्हाधिकारी, तालुका मामलतदार, वन आणि अग्निशमन अधिकारी यांच्या व्यतिरिक्त दक्षिण गोवा जिल्हा दंडाधिकारी बैठकीत उपस्थित होते.

गेल्या काही दिवसांपासून वनक्षेत्राला आग लागल्याने घटनांचा मागोवा घेण्याच्या सूचना जिल्हाधिकाऱ्यांनी वनाधिकाऱ्यांना दिल्याचे सूत्रांनी सांगितले.

आग आटोक्यात आणण्यासाठी समन्वित कार्यवाही करण्यासाठी अग्निशमन दलाला घटनांची माहिती नियंत्रण कक्षाला कळवावी असेही सांगण्यात आले.

तालुका मामलतदारांनी सर्व गावातील तलाठ्यांना सतर्क राहून आपापल्या कार्यक्षेत्रातील आगीच्या घटनांची माहिती देण्याच्या सूचना देण्यास सांगण्यात आले आहे. आग लवकरात लवकर आटोक्यात आणण्यासाठी त्यांना अग्निशमन दलाशी समन्वय साधण्यास सांगण्यात आले आहे.