Film City Project : फिल्म सिटीला तीव्र विरोध; राज्यपाल, मुख्य सचिवांना निवेदन

Film City Project : काणकोण, लोलये पंचायत क्षेत्रातील कोमुनिदाद मालकीच्या जागेत प्रस्तावित फिल्म सिटी प्रकल्पाला स्थानकांचा विरोध वाढू लागला आहे. दरम्यान, विरोधकांनी वाड्यावाड्यांवर बैठका घेऊन याबाबत लोकजागृती करण्यास सुरवात केली आहे.

लोलये-पोळे कोमुनिदाद संस्थेच्या खास आमसभेत नियोजित फिल्म सिटीसाठी एंटरटेनमेंट सोसायटीला जमीन देण्याच्या प्रस्तावाला मंजुरी देण्यात आली आहे.

भगवती पठारावरील २५० एकर जमीन या प्रकल्पासाठी संस्थेने एकमताने ठरवले आहे. जागेला मंजुरी मिळाल्याने सरकारने या प्रकल्पासाठी सल्लागार नियुक्त करण्याची प्रक्रिया सुरू केली आहे.

दरम्यान, या प्रकल्पामुळे पर्यावरणीय समस्या तसेच पाणी, वीज समस्यांना स्थानिकांना तोंड द्यावे लागेल. यासाठी या प्रकल्पाला कोमुनिदाद संस्थेची जागा देऊ नये असे निवेदन राज्यपाल, मुख्य सचिव व कोमुनिदाद प्रशासकांना सादर केले आहे.

या संदर्भात शुक्रवारी लोलयेच्या जैवविविधता समितीचे अध्यक्ष दत्तप्रसाद ऊर्फ मनोज प्रभुगावकर यांनी सरपंच निशा च्यारी यांची भेट घेऊन या प्रकल्पाला विरोध करणारे निवेदन सादर केले.

प्रकल्पामुळे तोटाच : प्रभुगावकर

यासंदर्भात लोलयेच्या जैवविविधता समितीचे अध्यक्ष दत्तप्रसाद प्रभुगावकर यांना विचारले असता, या प्रकल्पाचा लोलये पंचायत क्षेत्रातील रहिवाशांना काहीच फायदा होणार नाही.

वीस हजार रोजगार निर्मिती होणार असल्याचे सांगण्यात येते मात्र सध्या फिल्मसिटीमध्ये काम करण्याची क्षमता असलेले नागरिक लोलये पंचायत क्षेत्रात एक हजार पेक्षा कमी असल्याचे त्यांनी सांगितले. त्यामुळे या प्रकल्पाचा लोलये पंचायत क्षेत्राला फायदा होण्याऐवजी सर्वच बाजूंनी तोटा होणार असल्याचा दावा त्यांनी केला.

पंचायतीकडे पत्रव्यवहार नाही : च्यारी

या संदर्भात सरपंच निशा च्यारी यांनी सांगितले की, फिल्म सिटीसंदर्भात अद्याप पंचायतीकडे संबंधित खाते वा सरकारने कोणताच पत्रव्यवहार केला नाही. त्यामुळे हा विषय पंचायत मंडळाच्या बैठकीत चर्चेला आला नसल्याचे त्यांनी सांगितले.