Indian Super League: एफसी गोवासमोर बलाढ्य मुंबई सिटीचा अडथळा

Indian Super League Football

इंडियन सुपर लीग (आयएसएल) फुटबॉल स्पर्धेच्या दहाव्या मोसमात सलग बारा सामने अपराजित राहिल्यानंतर एफसी गोवा संघ आता जबरदस्त दबावाखाली आहे. सलग तीन पराभव पत्करल्यानंतर बुधवारी (ता.28) त्यांच्यासमोर बलाढ्य मुंबई सिटीचा अडथळा पार करण्याचे आव्हान आहे.

सामना मुंबई येथे खेळला जाईल. मुंबई सिटीचे सध्या १५ लढतीतून ३१ गुण असून ते दुसऱ्या क्रमांकावर आहेत. अव्वल स्थानावरील ओडिशापेक्षा (३२ गुण) त्यांचा फक्त एक गुण कमी आहे. मुंबई सिटीने मागील सलग तीन सामने जिंकले आहेत.

एफसी गोवाचे १५ लढतीनंतर २८ गुण असून ते पाचव्या क्रमांकावर घसरले आहेत. मागील लढतीत कोची येथे पूर्वार्धात दोन गोलची आघाडी घेऊनही एफसी गोवास केरळा ब्लास्टर्सकडून ४-२ फरकाने पराभूत व्हावे लागले.

एफसी गोवाच स्वतःचे प्रतिस्पर्धा - मार्केझ

सलग पराभवानंतर आपल्या संघाने आता सावरणे आवश्यक असून प्रत्युत्तरास सज्ज होणे गरजेचे आहे, सामना अत्यंत कठीण आहे, असे मत एफसी गोवाचे प्रशिक्षक मानोलो मार्केझ यांनी मुंबई सिटीविरुद्ध पूर्वसंध्येला मंगळवारी व्यक्त केले.

एफसी गोवा संघ सध्या स्वतःचाच प्रतिस्पर्धी बनला आहे. विजय मिळविल्यास संघाला गुणतक्त्यात प्रगतीची संधी असेल, याकडे एफसी गोवाच्या प्रशिक्षकाने लक्ष वेधले.