वाहतूक उल्लंघन दंडाच्या पैशांत घोटाळा होतोय? ई-चलन मशीन्समध्ये त्रुटी, पोलीस अधीक्षकांनी दिले स्पष्टीकरण

Fault in E-Challan Devices of Goa Traffic Police

राज्यातील वाहतूक पोलीस नियमांचे उल्लंघन करणाऱ्यांविरोधात कारवाई करण्यासाठी वाहनचालकांना ई-चलन देतात. मात्र मागील 4 वर्षांपासून वाहतूक पोलीस वापरत असलेली ही ई-चलन मशीन्स बनावट असल्याचे आता समोर आले आहे.

माहितीनुसार, या मशीन्समध्ये काहीतरी बग असल्याचे सांगण्यात येते. या मशीनद्वारे एकाच वेळी वेगवेगळ्या ठिकाणांवरून वेगवेगळ्या मशीन्सवर लॉगिन करता येते. त्यामुळे वाहतूक पोलिसांचा हा पैसे कमावण्याचा नवा फंडा असल्याचे बोलले जात आहे.

याबाबत पोलीस महासंचालक जसपाल सिंग यांनी या मशीन्समध्ये काहीतरी अडचण असल्याचे सांगत अधिकाऱ्यांची बाजू सांभाळून घेण्याचा प्रयत्न केला. मात्र मशीन्समधे बग आहे हे विभागाला कळण्यासाठी तब्बल 4 वर्षे वेळ का लागतो? असा सवाल सध्या उपस्थित केला जात आहे.

वाहतूक पोलीस अधीक्षक अक्षत कौशल म्हणाले की, वाहनचालकांनी कोणत्याही प्रकारचे वाहतूक नियम मोडल्यास त्यांच्यावर कारवाई करणे किंवा त्यांच्याकडून दंड वसूल करणे हे वाहतूक पोलिसांचे कामच आहे.

सध्या जरी एकापेक्षा जास्त डिव्हाईसवर लॉगिन करता येण्याचा मुद्दा समोर आला असला तरी त्या दंड मशीन्सवरून जमा होणारे पैसे हे सरकारच्या खात्यातच जमा होत आहेत.

जर हा वाहतूक दंड कोणत्याही वैयक्तिक बँक खात्यात वळवण्यात येत असेल तर संबंधितांवर कठोर कारवाई करण्यात येईल, असे कौशल यांनी सांगितले आहे.