Goa Accident: बेतोडा येथे दुचाकीचा तर ढवळी येथे दोन चारचाकींचा अपघात; एकाचा मृत्यु

राज्यात सोमवारी दोन अपघात झाल्याच्या घटना समोर येत आहेत. पहिला अपघात हा बेतोडा येथील बगल रस्त्यावर झाला. यात दुचाकीस्वाराचा मृत्यू झाला. तर दुसरा अपघात ढवळी येथे कार व पीकअप या दोन वाहनांमध्ये झाला. यात दोघे जखमी झाले आहेत.

याबाबत अधिक माहिती अशी की, बेतोडा येथील बगल रस्त्यावर उभी करुन ठेवलेल्या हिताची मशीनवर दुचाकीची धडक बसली. या धडकेत दुचाकीचालकाचा मृत्यू झाला आहे. हा अपघात रविवारी रात्री 9.30च्या सुमारास घडला.

आशीष नाईक (24 रा. बेतोडा) असे मृत युवकाचे नाव आहे. ही हिताची मशीन रस्त्याच्या कडेला होती. कंत्राटदाराच्या हलगर्जीपणामुळे हा अपघात घडल्याचा आरोप स्थानिकांनी केला आहे.

दुसरा अपघात हा ढवळी येथे झाला. कार व पीकअप या दोन वाहनांची समोरासमोर भीषण धडक झाल्याने हा अपघात झाला. या अपघातात यश पालयेकर (18, फोंडा), सिध्दी नाईक (19, कुडेचडे) जखमी झाले आहेत.

जखमींना गोमेकॉत उपचारासाठी दाखल करण्यात आले आहे. या अपघातात दोन्ही वाहनांच्या प्रथमदर्शनी भागाचे नुकसान झाले आहे.