Agriculture News : सरकारी नोकरी करून फुलविली शेती; आता देतात 100 कामगारांना रोजगार

श्यामकांत नाईक

Agriculture News : केपे, काही तरुण आपली स्वतःची शेतजमीन असूनही सरकारी नोकरीच्या मागे लागून आपला वेळ वाया घालवतात. मात्र, काही लोक स्वतःला शेती व्यवसायात गुंतवून ठेवतात व महिन्याकाठी लाखो रुपयांची कमाई करतात.

असेच केपे भागातील चंद्रहास कृष्णा फळदेसाई (७४) हे ज्येष्ठ नागरिक गेल्या ४७ वर्षांपासून शेती व्यवसायात असून त्यातून ते सध्या एका महिन्यात सुमारे दहा लाख रुपये कमावतात.

चंद्रहास फळदेसाई हे बीएससी ॲग्रीकल्चर पदवीधर आहेत. आपल्या केपे भागात असलेल्या सोळा हजार चौरस मीटर जमिनीत नारळ, नीरफणस, सुपारी, जायफळ अशा अनेक झाडांची लागवड केल्याचे फळदेसाई यांनी सांगितले.

आपण तीस वर्षे गोवा स्टेट बँकेत नोकरी केली असून वीस वर्षे कृषी अधिकारी म्हणून आपली सेवा दिली असल्याचे त्यांनी सांगितले. नोकरी करीत असताना आपल्या जमिनीत कृषी लागवड करण्यापासून कधीच माघार घेतली नाही.

बागायतीत असलेल्या झाडांच्या सहवासात राहणे आपल्याला पसंत असून सुमारे शंभर कामगार या बागायतीत कामाला आहेत. या लोकांना रोजगार उपलब्ध झाल्याने त्यांच्या कुटुंबीयांनाही यातून आर्थिक साहाय्य मिळते. शेतकऱ्यांसाठी राज्य सरकारने अनेक योजना मार्गी लावल्या आहेत. त्यांचा लाभ शेतकऱ्यांनी घेतला पाहिजे, असे फळदेसाई यांनी सांगितले.

१९७७ पासून मी कृषी क्षेत्रात कार्यरत असून आपल्या बागायतीत दोन हजार सुपारीची झाडे, साडेचारशे माड, शंभर जायफळाची झाडे तशीच नीरफणस व इतर प्रकारची झाडे आहेत. कृषी अधिकारी म्हणून काम करताना शेतकऱ्यांना मार्गदर्शन करून त्यांना सरकारी योजना मिळवून दिल्या.

- चंद्रहास फळदेसाई, निवृत्त कृषी अधिकारी