वाळपई: सत्तरी तालुक्यात गेल्या काही दिवसांपासून सोसाट्याच्या वाऱ्यासह कोसळत असलेल्या मुसळधार पावसामुळे शेतकरी व बागायतदारांचे मोठे नुकसान झाले आहे. या नुकसानग्रस्त बागायतदारांनी वाळपई कृषी विभागीय कार्यालयात भरपाई मिळावी म्हणून अर्ज करण्यास सुरूवात केली आहे. आतापर्यंत सत्तरी तालुक्यातून जवळपास ५५ जणांनी अर्ज दाखल केले असून त्यांचे सर्वेक्षण गेल्या चार दिवसांपासून हाती घेण्यात आले आहे.
गेल्या सोमवारपासून सर्वेक्षणाचे काम जलदगतीने हाती घेण्यात आले आहे. सुमारे ३० बागायतदारांच्या जागेत जाऊन पाहणी करुन अहवाल लिहून घेतलेला आहे. वाळपई कृषी खात्‍याचे अधिकारी विश्‍‍वनाथ गावस व त्यांचे सहकारी दिवसभर राबून सर्वेक्षणाचे काम करत आहेत.
नदीच्या पात्रात बांधलेल्या बंधाऱ्यात जंगली झाडांची लाकडे अडकून पडलेली आहेत. त्यामुळे पाण्‍याच्‍या प्रवाहाला अडथळा होऊन ते तुंबून जवळच्‍या बागायतीत, शेतात शिरते. त्यामुळे नुकसान होत आहे. म्हणूनच सरकारने या बंधाऱ्याचे योग्य व्यवस्थापन करावे अशी मागणी वेळूसचे नागरिक रामा गावकर यांनी केली आहे. वेळूस भागात वारंवार नदीचे पाणी बागायतींत घुसते. त्यामुळे दरवर्षी आम्हाला फटका बसतो, असे ते म्‍हणाले.
जून, जुलै महिन्यात सुपारी पिकावर औषधाची फवारणी केली जाते. यावर्षी मुसळधार पावसामुळे ती वेळेत करता आली नाही. ही औषध फवारणी तीस दिवसांच्या फरकाने दोन-तीन वेळा केली जाते. पण यावर्षी जून, जुलै महिन्यात पावसाने कहरच केल्याने फवारणी झालीच नाही. त्यामुळे आता सुपारी फळाची गळती होण्यास प्रारंभ झाला आहे. म्हणूनच सरकारने सुपारी पिकासाठीही नुकसान भरपाई योजना सुरू करण्याची मागणी बागायतदार करत आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.