Goa IIT: विरोधात शेतकऱ्यांचे धरणे आंदोलन सुरु

Sangeum: चार दिवसांच्या शांततेनंतर सांगेतील आयआयटी विरोधक शेतकऱ्यांनी दांडो-सांगे येथील शेतकऱ्याच्या दारातच धरणे आंदोलनाला सुरुवात केली आहे. तसेच जोपर्यंत न्याय मिळणार नाही तोपर्यंत आंदोलन सुरूच ठेवण्याचा निर्धार शेतकऱ्यांनी केला. या आंदोलनात पन्नासपेक्षा अधिक शेतकरी महिला सहभागी झाल्या होत्या.

शेतकरी आंदोलक महिला लुईझिना ओलिव्हर म्हणाल्या की, आजच्या परिस्थितीत सांगेला पुरेसे पाणी आणि वीज मिळत नाही. अशा परिस्थितीत आयआयटी प्रकल्प साकारल्यास सांगेवासीयांची काय परिस्थिती होणार, याचा विचार जनतेने करावा. सांगेचा निसर्ग आणि शेतीभाती नष्ट करून काँक्रिटची जंगले उभारायची काय. यातून फायदा कोणाचा होणार ते गुलदस्त्यातच आहे.

मिल्टन फर्नांडिस यांनी सरकारने शेतकऱ्यांचा आवाज दाबण्यासाठी आमच्या शेतजमिनीसभोवताली 144 कलम लावले आहे. या दबावतंत्राचा निषेध करण्यासाठी शेतकऱ्यांना आपला विरोध दर्शविण्यासाठी खुद्द शेतकऱ्याच्या दारात बसून धरणे आंदोलन सुरू करावे लागले आहे. आ

मचा आयआयटीला विरोध नाही: पण आमच्या जमिनी हिरावून असला प्रकल्प मुळीच नको, असे सांगितले. आज आमच्यासोबत सर्व शेतकरी आहेत म्हणून त्यांच्यात फूट घालण्याचा बनाव केला जात आहे. काही शेतकरी या बनावाला बळी पडतील; पण सर्वच शेतकऱ्यांना फसविणे शक्य होणार नाही. म्हणून साखळी पद्धतीने धरणे आंदोलनात शेतकरी वर्ग सहभागी झाला असल्याचे मिल्टन फर्नांडिस यांनी सांगितले.