Goa Fraud Case: बनावट 'आयपीओ'चे आमिष; ज्येष्ठाची 4 कोटींची फसवणूक, कोल्हापूर येथून संशयिताला अटक

पणजी : व्हॉट्सअ‍ॅप आणि यूट्यूब चॅनेलचा वापर करून बनावट गुंतवणूक कंपनी दाखवत खोट्या ‘आयपीओ’ मध्ये गुंतवणुकीचे प्रलोभन देत गोव्यातील एका ज्येष्ठ नागरिकाची ४.७४ कोटींची फसवणूक करणाऱ्या सूरज सावट (कोल्हापूर) याला सायबर क्राईम पोलिसांनी कोल्हापूरहून अटक केली. मोठ्या परताव्याचे आश्वासन देत संशयिताने तक्रारदाराला खोटे शेअर अलॉटमेंट दाखवून विश्वास संपादन केला होता.

या प्रकरणात तीन संशयितांपैकी सावटसह दोन जणांना अटक करण्यात आली असून तिसऱ्या आरोपीचा शोध सुरू आहे. सायबर तपासात या व्यवहारांचा १३.१० कोटींच्या आठ सायबर गुन्ह्यांशी संबंध असल्याचे समोर आले.

संशयिताने ‘लेयर १’ म्हणून साथीदारांच्या खात्यांत लाखो रुपये स्वीकारून पुढे विविध राज्यांतील खात्यांत वळवले होते. सावटला न्यायालयात हजर केले असता त्याला पोलिस कोठडी सुनावण्यात आली असून पुढील तपास सायबर क्राइम पोलिसांकडून सुरू आहे.

दरम्यान, २४ सप्टेंबर २०२५ रोजी ‘बीएनएस कायदा २०२३ मधील कलम ३१८(४), ३१९(२) सह ३(५) तसेच माहिती तंत्रज्ञान (आयटी) कायदा कलम ६६-डी अंतर्गत हा गुन्हा नोंदवण्यात आला आहे. २५ ऑगस्ट २०२५ पूर्वी संशयिताने आपला व्हॉट्सॲप आणि ‘यूट्यूब चॅनेल’ चा वापर करून आपली एक बनावट गुंतवणूक कंपनी असल्याचे सांगितले होते.